Rheolau newydd ar gyfer cenhedlaeth fwy diogel o blant ar-lein

• Ofcom yn cadarnhau mesurau diogelwch plant ar gyfer safleoedd ac apiau a fydd yn cael eu cyflwyno o fis Gorffennaf ymlaen
• Rhaid i gwmnïau technoleg weithredu i atal plant rhag gweld cynnwys niweidiol
• Bydd y newidiadau’n golygu ffrydiau cymdeithasol mwy diogel, archwiliadau oedran cadarn a mwy o gymorth a rheolaeth i blant ar-lein

Bydd bywydau plant yn y DU yn fwy diogel ar-lein, diolch i amddiffyniadau newydd a thrawsnewidiol a fydd yn cael eu cwblhau gan Ofcom heddiw.

Rydym yn gosod dros 40 o fesurau ymarferol er mwyn i gwmnïau technoleg gyflawni eu dyletswyddau o dan y Ddeddf Diogelwch Ar-lein. Bydd y rhain yn berthnasol i safleoedd ac apiau y mae plant y DU yn eu defnyddio mewn meysydd fel y cyfryngau cymdeithasol, peiriannau chwilio a chwarae gemau. Mae hyn yn dilyn ymgynghori ac ymchwil a oedd yn cynnwys degau o filoedd o blant, rhieni, cwmnïau ac arbenigwyr.

Mae’r camau’n cynnwys atal rhai dan 18 oed rhag dod ar draws y cynnwys mwyaf niweidiol sy’n ymwneud â hunanladdiad, hunan-niweidio, anhwylderau bwyta a phornograffi. Rhaid i wasanaethau ar-lein hefyd weithredu i amddiffyn plant rhag deunydd sy’n gysylltiedig â chasineb at fenywod a deunydd treisgar, cas neu sarhaus, bwlio ar-lein a heriau peryglus.

Dywedodd y Fonesig Melanie Dawes, Prif Weithredwr Ofcom: “Mae’r newidiadau hyn yn ailosod y sefyllfa ar gyfer plant ar-lein. Byddant yn golygu ffrydiau mwy diogel ar gyfryngau cymdeithasol, gyda chynnwys llai niweidiol a pheryglus, amddiffyniadau i atal dieithriaid rhag cysylltu â nhw a gwiriadau oedran effeithiol ar gynnwys oedolion. Mae Ofcom wedi cael y dasg o greu cenhedlaeth fwy diogel o blant ar-lein, ac os bydd cwmnïau’n methu â gweithredu, byddant yn wynebu camau gorfodi.”

Cenhedlaeth Fwy Diogel: yr hyn rydym yn ei ddisgwyl

Wrth lunio'r Codau Ymarfer sydd wedi'u cadarnhau heddiw, clywodd ein hymchwilwyr gan dros 27,000 o blant ac 13,000 o rieni, ochr yn ochr ag adborth gan y diwydiant, cymdeithas sifil, elusennau ac arbenigwyr diogelwch plant. Fe wnaethom hefyd gynnal cyfres o weithdai a chyfweliadau ymgynghori gyda phlant o bob cwr o’r DU i glywed eu barn am ein cynigion mewn amgylchedd diogel. [1]

Gan ystyried y safbwyntiau hyn, mae ein Codau’n mynnu dull gweithredu ‘diogelwch yn gyntaf’ o ran sut mae cwmnïau technoleg yn dylunio ac yn gweithredu eu gwasanaethau yn y DU. Mae’r mesurau’n cynnwys y canlynol:

• Ffrydiau mwy diogel. Argymhellion personol yw’r brif ffordd mae plant i ddod ar draws cynnwys niweidiol ar-lein. Rhaid i unrhyw ddarparwr sy’n gweithredu system argymell ac sy’n peri risg ganolig neu uchel o gynnwys niweidiol ffurfweddu ei algorithmau i hidlo cynnwys niweidiol o ffrydiau plant.
• Gwiriadau oedran effeithiol. Rhaid i’r gwasanaethau â’r risg mwyaf ddefnyddio trefn sicrhau oedran effeithiol iawn i nodi pa ddefnyddwyr sy’n blant. Mae hyn yn golygu y byddant yn gallu eu diogelu rhag deunydd niweidiol, gan gadw hawliau oedolion i gael gafael ar gynnwys cyfreithiol. Gall hynny gynnwys atal plant rhag defnyddio’r wefan neu’r ap i gyd, neu ddim ond rhai rhannau ohonynt neu rai mathau o gynnwys. Os oes gan wasanaethau ofynion oedran sylfaenol ond nad ydynt yn defnyddio gwiriadau oedran cadarn, rhaid iddynt dybio bod plant iau yn defnyddio eu gwasanaeth a sicrhau eu bod yn cael profiad sy’n briodol i’w hoedran.
• Gweithredu’n gyflym. Rhaid i bob gwefan ac ap fod â phrosesau ar waith i adolygu, asesu a mynd i’r afael yn gyflym â chynnwys niweidiol pan fyddant yn dod i wybod amdano.
• Mwy o ddewis a chefnogaeth i blant. Mae’n rhaid i wefannau ac apiau roi mwy o reolaeth i blant dros eu profiad ar-lein. Mae hyn yn cynnwys caniatáu iddynt nodi pa gynnwys nad ydynt yn ei hoffi, i dderbyn neu i wrthod gwahoddiadau i sgyrsiau grŵp, i rwystro a thewi cyfrifon ac i analluogi sylwadau ar eu postiadau eu hunain. Rhaid cael gwybodaeth gefnogol ar gyfer plant a allai fod wedi dod ar draws, neu fod wedi chwilio am, gynnwys niweidiol.
• Trefn haws i roi gwybod a gwneud cwynion. Bydd trefn syml i blant roi gwybod am gynnwys neu gwyno amdano, a dylai darparwyr ymateb drwy gymryd y camau priodol. Rhaid i’r telerau gwasanaeth fod yn ddigon clir i’r plant allu eu deall.
• Llywodraethu cadarn. Rhaid i bob gwasanaeth enwi person sy’n atebol am ddiogelwch plant, a dylai uwch gorff gynnal adolygiad blynyddol o’r trefniadau o reoli risg i blant.

  Mae’r mesurau hyn yn adeiladu ar y rheolau rydyn ni eisoes wedi’u sefydlu i amddiffyn defnyddwyr, gan gynnwys plant, rhag niwed anghyfreithlon ar-lein - gan gynnwys meithrin perthynas amhriodol. Maent hefyd yn ategu gofynion penodol ar safleoedd pornograffi  i atal plant rhag dod ar draws pornograffi ar-lein.  

Beth sy’n digwydd nesaf

Mae gan ddarparwyr gwasanaethau sy’n debygol o gael eu defnyddio gan blant yn y DU tan 24 Gorffennaf i gwblhau a chofnodi eu hasesiad o’r risg y mae eu gwasanaethau’n eu peri i blant, y gall Ofcom ofyn amdano. Yna, dylent roi mesurau diogelwch ar waith i liniaru’r risgiau hynny [2]. O 25 Gorffennaf 2025, dylent roi ar waith y mesurau diogelwch a nodir yn ein Codau i liniaru’r risgiau hynny. [3]

Os na fydd cwmnïau’n cydymffurfio â’u dyletswyddau newydd, mae gan Ofcom y pŵer i roi dirwyon ac – mewn achosion difrifol iawn – i wneud cais am orchymyn llys i atal y safle neu’r ap rhag bod ar gael yn y DU.

Codau Ymarfer heddiw sy’n gosod y seiliau ar gyfer cyfnod newydd o reoleiddio diogelwch plant ar-lein. Byddwn yn adeiladu arnynt gydag ymgyngoriadau pellach, yn ystod y misoedd nesaf, ar fesurau ychwanegol i ddiogelu defnyddwyr rhag deunydd anghyfreithlon a niwed i blant. [5]

DIWEDD

1. Fe wnaethom rannu cynigion sy’n briodol i oedran â grŵp o 112 o blant, a fu’n trafod eu safbwyntiau mewn rhaglen ymgysylltu gydgynghorol.

2. Ym mis Mawrth, fe wnaethom lansio rhaglen orfodi ar ddelweddau o blant yn cael eu cam-drin yn rhywiol ar wasanaethau rhannu ffeiliau. Yn gynharach y mis hwn, fe wnaethom lansio ymchwiliad i weld a yw darparwr fforwm hunanladdiad ar-lein wedi methu cydymffurfio â’i ddyletswyddau o dan Ddeddf Diogelwch Ar-lein y Deyrnas Unedig.
3. Heddiw, mae Llywodraeth y DU wedi rhoi ein Codau gerbron y Senedd i’w cymeradwyo, yn unol â gofynion y Ddeddf. Ar yr amod bod ein Codau’n cwblhau’r broses Seneddol yn ôl y disgwyl, o 25 Gorffennaf ymlaen, bydd yn rhaid i ddarparwyr roi ar waith y mesurau diogelwch a nodir yn ein Codau (neu gymryd camau eraill i gyflawni eu dyletswyddau) i liniaru’r risgiau y mae eu gwasanaethau’n eu hachosi i blant.
4. Rydym hefyd wedi cyhoeddi gwybodaeth a chyngor . sy’n egluro i rieni beth mae ein mesurau’n ei olygu’n ymarferol, awgrymiadau ar gadw plant yn ddiogel ar-lein a ble gallan nhw gael rhagor o gymorth. Mae hyn yn cynnwys fideo sy’n egluro’r newidiadau i blant. Ochr yn ochr â hyn, rydym wedi rhyddhau cynnwys fideo newydd sy’n cynnwys cwestiynau go iawn, gan rieni go iawn, y maent am eu gofyn i gwmnïau cyfryngau cymdeithasol ynghylch y cynnwys niweidiol mae plant yn dod ar ei draws ar-lein. Gwyliwch y fideo yn llawn yma.
5. 5. Cyn bo hir, byddwn yn cyhoeddi ymgynghoriad ar fesurau ychwanegol i gryfhau ymhellach y mesurau diogelu rydym yn disgwyl i wasanaethau eu defnyddio, gan gynnwys y canlynol:

• gwahardd cyfrifon pobl sy’n rhannu deunydd o blant yn cael eu cam-drin yn rhywiol (CSAM);
• cyflwyno protocolau ymateb i argyfwng ar gyfer argyfyngau;
• defnyddio trefn gyfateb hashnodau i atal rhannu delweddau personol heb gydsyniad a chynnwys terfysgol;
• mynd i’r afael â niwed anghyfreithlon gan gynnwys CSAM drwy ddefnyddio deallusrwydd artiffisial;
• defnyddio dulliau sicrwydd oedran effeithiol iawn i atal meithrin perthnasoedd amhriodol â phlant; ac
• rydym yn cydnabod bod ffrydio byw yn gallu creu risgiau penodol i blant. Bydd ein hymgynghoriad sydd ar y gweill yn nodi’r dystiolaeth ynghylch ffrydio byw, ac yn gwneud cynigion i leihau’r risgiau hyn.