Mae’r BBC a Warner Bros. Discovery wedi ysgrifennu at Ofcom i nodi eu cynlluniau ar gyfer darlledu Gemau Olympaidd yr Haf 2024, a fydd yn cael eu cynnal ym Mharis rhwng 26 Gorffennaf ac 11 Awst 2024. Mae’r Gemau Olympaidd wedi’u dynodi’n ddigwyddiad rhestredig Grŵp A, sy’n golygu efallai y bydd darlledwyr angen caniatâd gan Ofcom ar gyfer eu cynlluniau darlledu byw mewn rhai amgylchiadau.[1]
Mae’r dudalen hon yn egluro pam nad yw’r cynlluniau darlledu angen caniatâd gan Ofcom.
Mae’r drefn digwyddiadau rhestredig yn newid o ganlyniad i Ddeddf Cyfryngau 2024. Ochr yn ochr â’r nodyn hwn, rydym wedi cyhoeddi cais am dystiolaeth er mwyn cefnogi ein gwaith i roi newidiadau'r Ddeddf Cyfryngau ar waith yn y rheolau ar ddigwyddiadau rhestredig. Mae’r cais am dystiolaeth yn gofyn am fewnbwn i’n helpu i ddiffinio termau allweddol yn y drefn ddiwygiedig, gan gynnwys ystyried pryd y dylai darllediadau byw o’r Gemau Olympaidd gael eu hystyried yn ‘ddigonol’ at ddibenion y drefn.
Beth yw digwyddiadau rhestredig?
Nod y drefn digwyddiadau rhestredig yw sicrhau bod darlledwyr am ddim yn cael cyfle i gaffael hawliau darlledu byw i ddarlledu digwyddiadau penodol sydd o ddiddordeb cenedlaethol sylweddol i gynulleidfaoedd yn y DU. Mae’r fframwaith presennol yn rhannu sianeli darlledwyr yn ddau gategori: gwasanaethau ‘cymwys’ (gan gynnwys y prif sianeli darlledu gwasanaeth cyhoeddus, sef BBC One a BBC Two, ITV/STV, Channel 4 a Channel 5) sy’n cyrraedd 95% o’r boblogaeth heb gost ychwanegol i’r gwyliwr, a’r gwasanaethau ‘nad ydynt yn gymwys’, sydd ddim. Ar hyn o bryd, dim ond i wasanaethau darlledu llinol y mae’r fframwaith hwn yn berthnasol.
Rhaid i unrhyw ddarlledwr sydd eisiau dangos darllediadau byw ac egsgliwsif o ddigwyddiad rhestredig, boed hynny’n llawn neu’n rhannol, gael caniatâd gan Ofcom. Fodd bynnag, lle mae’r hawliau i ddarlledu digwyddiadau rhestredig yn fyw wedi cael eu caffael gan ddarlledwyr ‘cymwys’ a darlledwyr ‘nad ydynt yn gymwys’, nid oes angen caniatâd ar y darlledwyr hynny fel rheol.
Warner Bros. Discovery a’r BBC yn bwriadu darlledu’r Gemau Olympaidd yn fyw a’u darparu ar-alw ar eu prif sianeli
Yn 2015, sicrhaodd Discovery (fel yr oedd yn cael ei alw bryd hynny) hawliau amlgyfrwng unigryw i ddarlledu Gemau Olympaidd 2024 ar draws 50 o wledydd Ewrop, gan gynnwys y DU. Fel rhan o hyn, ymrwymodd Discovery i sicrhau bod o leiaf 200 o oriau o Gemau Olympaidd 2024 yn cael eu darlledu am ddim ym mhob un o’r tiriogaethau hyn. Yn dilyn hynny, ymrwymodd y BBC i gytundeb gyda Discovery i ddod yn bartner ar gyfer darlledu Gemau Olympaidd 2024 yn rhad ac am ddim.
Dyma ganlyniad y trefniadau hyn ar gyfer y Gemau Olympaidd eleni:
- Bydd Warner Bros. Discovery (WBD) yn darlledu yn fyw ar ei ddwy brif sianel chwaraeon – Eurosport 1 ac Eurosport 2. Bydd hefyd yn dangos darllediadau byw o’r Gemau Olympaidd, a’u darparu ar-alw, drwy ei lwyfan ffrydio ‘discovery+’.
- Bydd y BBC yn darlledu yn fyw ar BBC One neu BBC Two a drwy un ffrwd arall, ar unrhyw un adeg. Nid oes cyfyngiadau ar ba ddigwyddiadau chwaraeon y bydd yn eu darlledu yn fyw, ac nid oes cyfyngiadau ar faint o oriau darlledu byw – nac uchafbwyntiau – y gall eu dangos ar ei ddwy ffrwd. Bydd y BBC hefyd yn darlledu yn fyw ar y radio, ar BBC Radio 5 Live a BBC Radio 5 Sports Extra.
Nid yw’r rheolau presennol yn mynnu bod y BBC na WBD yn cyflwyno eu cynlluniau i Ofcom ar gyfer Gemau Olympaidd 2024
Nid yw'r rheolau presennol yn berthnasol i'r darllediadau o'r Gemau Olympaidd ar y llwyfan ffrydio 'discovery+’. Nid yw’r ddarpariaeth linol a fydd yn cael ei darlledu gan y BBC a WBD yn gofyn am ganiatâd gan Ofcom. Mae eithriad yn berthnasol ar gyfer achosion pan fo darllediadau yn cael eu darlledu ar y ddau gategori gwasanaeth o dan y rheolau ar ddigwyddiadau rhestredig (h.y. gwasanaethau darlledu’r BBC sy’n wasanaethau ‘cymwys’, ac Eurosport 1 a 2 sy’n wasanaethau ‘nad ydynt yn gymwys’).
Cyhoeddodd Ofcom nodyn ar drefniadau tebyg rhwng y BBC a Discovery ar gyfer Gemau Olympaidd y Gaeaf 2022.
Newidiadau’r Ddeddf Cyfryngau i’r rheolau ar ddigwyddiadau rhestredig
Bydd Deddf Cyfryngau 2024 yn diwygio’r rheolau ar ddigwyddiadau rhestredig. Mae’r Ddeddf yn diweddaru’r ystod o wasanaethau sy’n dod o fewn cwmpas y drefn, ac yn cyfyngu ‘gwasanaethau cymwys’ i’r rhai sy’n cael eu darparu gan ddarlledwr gwasanaeth cyhoeddus. Pan fydd mewn grym, bydd y Ddeddf yn cwmpasu amrywiaeth o ddarparwyr newydd (fel ‘gwasanaethau nad ydynt yn gymwys’) gan gynnwys gwasanaethau ffrydio, a allai fod angen caniatâd gan Ofcom i ddangos darllediadau byw ac egsgliwsif o ddigwyddiad rhestredig. Fodd bynnag, ni fydd hyn yn effeithio ar y trefniadau cytundebol presennol, gan gynnwys y trefniadau sydd ar waith rhwng WBD a’r BBC hyd at, a gan gynnwys, Gemau Olympaidd yr Haf 2032.
Ochr yn ochr â’r nodyn hwn, rydym heddiw wedi cyhoeddi cais am dystiolaeth i gefnogi ein gwaith i roi newidiadau’r Ddeddf Cyfryngau ar waith yn y rheolau ar ddigwyddiadau rhestredig. Mae’r cais am dystiolaeth yn gofyn am fewnbwn i’n helpu i ddiffinio'r termau allweddol a ddefnyddir yn y drefn ddiwygiedig, gan gynnwys ystyried pryd y dylai darllediadau byw o’r Gemau Olympaidd gael eu hystyried yn ‘ddigonol’.
[1] Cafodd y fersiwn diweddaraf o’r rhestr o ddigwyddiadau (o 18 Gorffennaf 2024 ymlaen) ei gyhoeddi ar 25 Ebrill 2022 gan yr Adran dros Dechnoleg Ddigidol, Diwylliant, y Cyfryngau a Chwaraeon (fel yr oedd yn cael ei galw bryd hynny).