Selina Chadha, director of Consumer Policy inside of a phone box

Yn galw ar yr holl ddefnyddwyr ffôn talu: miloedd o flychau ffôn ar fin cael eu diogelu

Ffonau a band eang Blychau ffôn Newyddion a diweddariadau
Cyhoeddwyd: 9 Tachwedd 2021
Diweddarwyd diwethaf: 16 Mawrth 2023
  • Cynlluniau i ddiogelu ffonau talu mewn ardaloedd sydd â signal symudol gwael neu gyfraddau damweiniau uchel
  • Hefyd, diweddariad i'r rheolau i gefnogi dyfeisiau ar y stryd sy’n cynnig galwadau, Wi-Fi a gwefru am ddim
  • Os nad oes angen ffôn talu mwyach, gall cymunedau ailddefnyddio'r ciosgau coch tirnod

Bydd miloedd o flychau ffôn hanfodol ledled y DU yn cael eu diogelu rhag cael eu cau, o dan gynlluniau a gyhoeddir gan Ofcom heddiw.

Gyda 96% o oedolion bellach yn berchen ar ffôn symudol a’r signal symudol yn gwella’n sylweddol dros y blynyddoedd diwethaf, mae’r ffordd y mae pobl yn gwneud galwadau’n newid.

Fel rhan o symud i linellau ffôn digidol, sy’n golygu y bydd angen buddsoddi i uwchraddio blychau ffôn, mae BT ar hyn o bryd yn asesu pa rai ohonynt nad oes eu hangen mwyach ac a all gael eu datgomisiynu. Ond o dan y broses bresennol ar gyfer dileu ffonau talu, mae risg y bydd rhai sydd eu hangen ar gymunedau lleol yn cael eu tynnu ymaith.

Felly mae Ofcom yn cynnig rheolau cliriach a chryfach i ddiogelu blychau ffôn rhag cael eu tynnu ymaith, os oes unrhyw un o bedwar maen prawf yn berthnasol:

  • nid yw’r lleoliad eisoes yn derbyn signal gan bob un o'r pedwar rhwydwaith symudol; neu
  • mae llawer o ddamweiniau neu achosion o hunanladdiad wrth y lleoliad; neu
  • os gwnaed mwy na 52 o alwadau ohono dros y 12 mis diwethaf; neu
  • os oes amgylchiadau eithriadol sy'n golygu bod angen blwch ffôn cyhoeddus.[1]

Rydym yn amcangyfrif y byddai tua 5,000 o flychau ffôn ledled y DU yn cael eu diogelu rhag cael eu tynnu ymaith o dan y rheolau newydd. Gall BT a KCOM wneud cynnig i dynnu ymaith y blychau ffôn nad ydynt yn dod o dan y meini prawf llym hyn, ond byddai angen iddynt ymgynghori’n ffurfiol â chymunedau lleol cyn cymryd unrhyw gamau.

Mae rhai o'r blychau ffôn rydym yn bwriadu eu diogelu'n cael eu defnyddio i wneud nifer cymharol isel o alwadau. Ond os yw un o'r galwadau hynny gan blentyn mewn trallod, rhywun sydd wedi cael damwain neu rywun sy'n meddwl am ladd eu hunan, gall y ffôn cyhoeddus hwnnw fod yn llinell fywyd ar adeg o angen enbyd.

Rydyn ni eisiau sicrhau hefyd y gall pobl nad oes ganddynt signal symudol, sydd yn aml mewn ardaloedd gwledig, wneud galwadau o hyd. Ar yr un pryd, rydym yn bwriadu cefnogi darpariaeth blychau ffôn newydd sydd â Wi-Fi a gwefru am ddim.

Selina Chadha, Cyfarwyddwr Cysylltedd Ofcom

O dan ein cynlluniau, mae'n rhaid i BT a KCOM – sy'n gweithredu blychau ffôn gwyn unigryw Hull – hefyd osod batris mewn rhai ffonau talu, fel y gellir eu defnyddio o hyd yn ystod toriad trydan.

Pwy sy'n defnyddio ffonau talu o hyd?

Ar hyn o bryd mae tua 21,000 o flychau ffôn ledled y wlad. I bobl sydd heb fynediad i ffôn symudol, neu mewn ardaloedd sydd â signal symudol gwael, gall y rhain fod yn llinell fywyd ar gyfer gwneud galwadau i ffrindiau a theulu, gwasanaethau llinell gymorth a chael mynediad at y gwasanaethau brys.

Gwnaed bron 150,000 o alwadau i'r gwasanaethau brys o flychau ffôn yn y flwyddyn hyd at fis Mai 2020, gwnaed 25,000 o alwadau i Childline a 20,000 i'r Samariaid.

Ar yr un pryd, mae'r gwasanaethau sydd eu hangen ar bobl gan flychau ffôn cyhoeddus yn newid. Mae maint y galwadau wedi gostwng o tuag 800m o funudau yn 2002 i ddim ond 7m yn 2020. Mae cenhedlaeth newydd o hybiau stryd sy'n cael eu cyflwyno gan BT yn darparu gwasanaethau fel Wi-Fi a gwefru am ddim.

Felly rydym yn cynnig y dylid caniatáu mwy o hyblygrwydd i BT a KCOM o ran yr amrywiaeth o wasanaethau y gallant eu darparu yn eu blychau ffôn, er mwyn cadw i fyny ag anghenion pobl.[2]

Esblygiad y blwch ffôn cyhoeddus

Evolution of the public call box from 1921 to 2021

BT and KCOM provide around 21000 public call boxes across the U K. 5 million calls were made from them last year, 150000 were emergencies, 25000 were to childline and 20k to samaritans. Calls have decreased from 800m minutes in 2002 to 7 million in 2020. Since BT launched its adopt a kiosk scheme over 6000 kiosks have been converted into defibrillators and libraries.

Nodiadau i olygyddion

  1. Amgylchiadau eithriadol: Gallai'r categori hwn gynnwys materion sy'n berthnasol i leoliad daearyddol y blwch ffôn (er enghraifft lleoliad ar yr arfordir lle mae'r signal symudol yn fregus); yn ogystal â'r mathau o alwadau sy’n cael eu gwneud o'r ffôn, megis i rifau llinellau cymorth.
  2. Ers nifer o flynyddoedd mae BT wedi bod yn datgomisiynu ffonau talu y mae wedi asesu nad oes eu hangen mwyach. Er hynny, gall awdurdodau lleol sydd am gadw'r ciosgau coch eiconig ddefnyddio cynllun 'Mabwysiadu Ciosg' BT. O dan y cynllun, gall cyrff lleol brynu ciosg coch am £1 a'i ddefnyddio at ddiben arall. Ers i BT lansio'r cynllun, mae dros 6,000 o ciosgau wedi cael eu trawsnewid i ystod o wahanol ddefnyddiau, megis llyfrgelloedd cymunedol neu fel cartref i beiriannau diffibrilio a all achub bywydau.
  3. Rydym hefyd yn ymgynghori ar ddileu'r gofyniad i ddarparu gwasanaeth ffacs.

Rheolau newydd i'ch helpu i gael signal symudol gwell dan do

Os ydych yn ei chael yn anodd derbyn signal symudol da dan do, cyn bo hir bydd modd i chi brynu amrywiaeth ehangach o ddyfeisiau i'ch helpu i gael signal gwell, o dan reolau newydd a gyhoeddir gan Ofcom heddiw

Sut i ddiogelu eich hun yn erbyn galwadau ffôn a negeseuon testun sgam

Ni fu erioed yn bwysicach diogelu eich hun yn erbyn galwadau ffôn a negeseuon testun sgam. Maent wedi bod ar gynnydd, yn enwedig yn ystod cyfnodau clo'r flwyddyn a hanner ddiwethaf, ac mae ymchwil Ofcom yn dangos bod llawer ohonom wedi dod i gysylltiad â rhyw fath o sgam.

Cael trafferth fforddio’ch gwasanaeth ffôn neu fand eang? Gallai 'tariff cymdeithasol' helpu

Os ydych chi'n cael trafferth talu am eich ffôn neu wasanaeth band eang, peidiwch â'i anwybyddu. Dylech siarad â'ch darparwr cyn gynted â phosibl i weld sut y gallent eich helpu.

Yn ôl i'r brig