Mae'r cyfnod pan mai dim ond un neu ddau o ddarparwyr allai gynnig ffôn yn eich cartref wedi hen fynd heibio.
Nawr gallwch chi ddewis o blith nifer fawr o gwmnïau, a gellir prynu gwasanaethau ffôn fel gwasanaethau annibynnol neu fel rhan o fargeinion wedi eu bwndelu ochr yn ochr â gwasanaethau eraill, fel teledu, band eang a gwasanaethau symudol.
Mae’r canllaw hwn yn egluro beth sydd angen i chi ei wneud os ydych chi eisiau newid eich llinell dir i ddarparwr newydd.
Newid Un Cam
O fis Medi 2024 ymlaen, bydd proses newid newydd ar gyfer yr holl wasanaethau band eang a llinell dir o’r enw ‘Newid Un Cam’ yn cael ei defnyddio. Bydd y broses hon yn haws, yn gyflymach ac yn fwy dibynadwy i gwsmeriaid.
O dan y broses hon, does dim rhaid i chi siarad â’ch darparwr presennol. Yn lle hynny, gall eich darparwr newydd drefnu’r trosglwyddiad ar eich rhan. Yn syml, bydd angen i chi roi ychydig o fanylion iddyn nhw gan gynnwys eich cyfeiriad ac enw eich darparwr presennol.
Bydd y manylion hyn yn cael eu cyfateb â chofnodion eich darparwr presennol, a byddant yn anfon unrhyw wybodaeth bwysig atoch chi ar unwaith i’w hystyried wrth benderfynu a ddylid bwrw ymlaen â’r newid. Gall hyn gynnwys ffioedd terfynu cynnar neu effaith y newid ar unrhyw wasanaethau eraill rydych chi’n eu cael ar hyn o bryd. Os byddwch chi’n penderfynu bwrw ymlaen â’r newid, bydd y darparwr newydd yn trefnu hyn ar gyfer y dyddiad newid rydych chi’n ei ffafrio.
Ar ddiwrnod y newid, ar ôl cadarnhau bod eich gwasanaeth newydd yn gweithio’n iawn, bydd eich darparwr newydd yn rhoi gwybod i’ch hen ddarparwr i roi’r gorau i’ch gwasanaeth presennol ac ni ddylech chi orfod talu am unrhyw daliadau cyfnod rhybudd y tu hwnt i’r dyddiad hwn. Ni ddylai unrhyw wasanaeth gael ei golli am fwy nag un diwrnod gwaith yn ystod newid.
O dan ein rheolau newydd, bydd yn rhaid i ddarparwyr hefyd eich digolledu mewn ffordd hawdd ac amserol os bydd pethau’n mynd o chwith, er enghraifft, os na fydd gennych chi wasanaeth am fwy nag un diwrnod gwaith, neu os byddant yn colli unrhyw apwyntiadau gwasanaeth neu osod. Rydyn ni’n disgwyl i ddarparwyr dalu iawndal o’r fath o fewn 30 diwrnod i gwblhau newid hwyr, neu ddyddiad unrhyw apwyntiad a fethwyd.
Gallwch gadw eich rhif ffôn presennol ar y llinell dir pan fyddwch chi'n newid darparwr. Gelwir hyn yn ‘cludo rhif’. Os ydych chi am gadw eich rhif, rhowch wybod i'ch darparwr newydd. Gallwch wneud cais i gadw eich hen rif ffôn am ddim hyd yn oed os ydych chi eisoes wedi canslo eich gwasanaeth blaenorol (ar yr amod eich bod yn gwneud cais o fewn mis i ganslo). Ond, efallai na fyddwch chi’n gallu cadw rhif ffôn presennol eich llinell dir os ydych chi'n newid darparwr llinell dir yr un pryd â symud i gartref newydd.
Os ydych chi'n newid eich meddwl, mae'n rhaid i chi gysylltu â'ch darparwr newydd i ganslo’ch cais i newid.
Newid bwndel
Os ydych chi’n newid darparwr ar gyfer bwndel o wasanaethau llinell dir a band eang ar yr un pryd, byddwch chi fel arfer yn dilyn y broses a ddisgrifir uchod.
Pan fyddwch chi wedi gofyn am gadw’ch rhif ffôn presennol, a bod modd gwneud hynny, does dim angen i chi roi gwybod i'ch hen ddarparwr eich bod chi'n symud at ddarparwr llinell dir newydd.
Ond, efallai y bydd angen i chi roi gwybod iddyn nhw er mwyn canslo gwasanaethau eraill rydych chi hefyd yn eu newid fel rhan o fwndel - yn enwedig os yw'r newid yn golygu canslo gwasanaeth teledu. Bydd eich hen ddarparwr yn rhoi gwybodaeth i chi am eich opsiynau o ran y gwasanaethau hyn yn y wybodaeth y byddant yn ei hanfon atoch ynglŷn â’r newid.
Ffioedd terfynu cynnar a’r cyfnod newid meddwl
Os ydych chi eisiau newid darparwr cyn i gyfnod eich contract sylfaenol ddod i ben, efallai y bydd yn rhaid i chi dalu ffioedd terfynu’n gynnar. Os ydych chi’n defnyddio proses newid un cam, bydd eich darparwr presennol yn rhoi gwybod i chi’n awtomatig am unrhyw ffioedd terfynu.
A chofiwch, mae gennych chi’r hawl i ganslo eich archeb o fewn 14 diwrnod calendr (y cyfnod ‘newid meddwl’). Fodd bynnag, os yw eich gwasanaeth eisoes wedi dechrau, efallai y codir tâl arnoch am gyfran o’r gwasanaeth rydych chi eisoes wedi’i ddefnyddio pan fyddwch chi’n canslo a/neu unrhyw gostau gosod.
Rheoli eich newid dros eich hun
Efallai y byddwch yn dewis gofyn i'ch darparwr newydd beidio â rheoli'r newid ar eich rhan, er enghraifft os byddai'n well gennych gael cyfnod o orgyffwrdd rhwng y darparwr newydd a chanslo eich hen wasanaeth. Yn yr achos hwn, byddai angen i chi archebu'r gwasanaeth gyda'ch darparwr newydd a chysylltu â'ch hen ddarparwr ar wahân i ganslo'ch contract presennol ar yr adeg briodol. Fodd bynnag, byddwch yn ymwybodol na fyddai'r broses newid un cam yn berthnasol yn yr achos hwn.