Diweddariadau trwyddedu

Mae’r hysbysiad hwn yn rhoi’r wybodaeth ddiweddaraf am yr amserlenni gweithredu disgwyliedig ar gyfer amrywiaeth o newidiadau i bolisi cynnyrch trwydded sbectrwm, yn ogystal â swyddogaethau newydd ar-lein.

Mae'r amserlenni hyn wedi'u crynhoi yn y tabl isod.

Diweddariadau allweddol

1. Rydym yn falch o gadarnhau fod y canlynol yn weithredol o heddiw ymlaen:

• proses ymgeisio interim ar gyfer Trwyddedau Rhannu Mynediad pŵer isel a chanolig yn y band 26 GHz, gweler eitem 1 yn y tabl isod; ac
• argaeledd nodweddion Rhannu Mynediad ychwanegol, gan gynnwys llai o bellteroedd gwahanu rhwng defnyddwyr i wella mynediad sbectrwm (fel y cadarnhawyd yn ein datganiad ym mis Gorffennaf 2024), gweler eitem 2 yn y tabl isod.

2. LPE-3 – Dyddiad Mynd yn Weithredol: 

• Mae disgwyl i drydydd cam ein rhaglen LPE fod yn weithredol ym mis Ebrill 2025 yn ôl y disgwyl.
• Rydym yn disgwyl cadarnhau’r dyddiad yn ein diweddariad nesaf, sydd wedi’i drefnu ar gyfer 18 Chwefror 2025.

3. Gweithgareddau sy’n parhau:

• Bydd y nodweddion Rhannu Mynediad sy’n weddill yn cael eu cyflwyno fesul cam, LPE 3.1, fel y nodir yn y tabl.
• Nid oes unrhyw ddiweddariadau newydd ar hyn o bryd ar y fframwaith trwyddedu Radio Amatur Cam 2 a 3, ac mae disgwyl i’r rhain gael eu cwblhau yn Chwarter 3 2025 yn ôl y disgwyl.

Cyfnod ymgeisio ar agor ar gyfer y Bandiau 26 GHz (mmWave) ar gyfer trwyddedau Rhannu Mynediad

Oherwydd yr oedi wrth lansio LPE-3, rydym yn cyflwyno proses interim i gyhoeddi trwyddedau 26GHz. Rydym yn falch o’ch hysbysu bod y cyfnod ymgeisio bellach ar agor. Llenwch y ffurflen gais Rhannu Mynediad. Ar ôl i LPE-3 gael ei lansio, bydd ymgeiswyr yn gallu gwneud cais yn uniongyrchol drwy ein Porth Trwyddedu. 

LPE-3

Mae LPE yn rhan o raglen ehangach i symleiddio ac awtomeiddio’r ddarpariaeth o drwyddedau sbectrwm. Rydym yn disgwyl y bydd y system trwyddedu sbectrwm newydd yn weithredol erbyn mis Ebrill 2025. Yn y diweddariad nesaf, byddwn yn cadarnhau’r dyddiad lansio ac yn rhannu rhai o’r prif nodweddion y bydd LPE-3 yn eu cynnig i’ch profiad o wneud cais am drwydded. 

Wrth i ni newid ein systemau a’n prosesau i wneud y gwelliannau hyn, mae’n bosibl y bydd yr amseroedd cwblhau yn cael eu heffeithio ychydig o ran ceisiadau am drwyddedau.  Byddwn yn gwneud ein gorau i leihau unrhyw oedi, ac rydym yn ddiolchgar am eich amynedd yn ystod y cyfnod hwn. Byddwn yn rhoi rhagor o fanylion yn ein diweddariad nesaf.

Mae ein cynnyrch a’n gweithgareddau trwyddedu presennol (gan gynnwys y cynnyrch Rhannu Mynediad a Radio Amatur presennol) yn parhau fel arfer. Mae’r holl gynnyrch trwydded y gellir gwneud cais amdanynt ar gael yn ein Porth Trwyddedau.

Mae disgrifiad llawn o benderfyniadau polisi a’r nodweddion newydd ar gyfer Rhannu Mynediad ar gael yn ein Datganiadau mis Gorffennaf 2024 a mis Rhagfyr 2024. Mae gwybodaeth am y Fframwaith Amatur Radio ar gael yma.

Mae’r amserlenni ar y dudalen we hon yn adlewyrchu ein safbwynt diweddaraf ar weithredu ers cyhoeddi’r datganiadau hyn.

Byddwn yn rhoi’r wybodaeth ddiweddaraf i chi ar y dudalen we hon wrth i ragor o wybodaeth ddod i law.

Bydd ein diweddariad nesaf yn cael ei gyhoeddi ym mis Chwefror. I gael rhagor o wybodaeth, cysylltwch â spectrum.licensing@ofcom.org.uk.

Mae’r tabl isod yn nodi ein cynllun gweithredu disgwyliedig ar gyfer amrywiaeth o newidiadau i bolisi cynnyrch trwydded sbectrwm, yn ogystal â swyddogaethau newydd ar-lein.

Mae hyn yn cynnwys yr wybodaeth ddiweddaraf am argaeledd nodweddion trwydded Rhannu Mynediad (SAL). Er cyflawnder, rydym yn rhestru’r holl welliannau SAL rydym wedi’u cyhoeddi yn dilyn ein proses ymgynghori yn 2024 a’n datganiadau ar sail hynny.

Yn ein diweddariad blaenorol (25 Hydref 2024), gwnaethom hysbysu rhanddeiliaid am yr effaith ar weithredu SAL oherwydd oedi cyn rhyddhau ein llwyfan trwyddedu LPE 3.0, a achoswyd gan faterion yn codi wrth ddatblygu cynnyrch. Ers hynny, rydym wedi gallu gwella amserlenni ar gyfer cyflwyno rhai swyddogaethau SAL allweddol a darparu golwg fanylach ar argaeledd y nodweddion sy’n weddill.  Bydd rhagor o nodweddion yn cael eu rhyddhau mewn modd cynyddrannol yn LPE 3.1, fel y gwelir yn y tabl.

Rydym hefyd yn rhoi’r wybodaeth ddiweddaraf am y cynllun gweithredu ar gyfer ein fframwaith trwyddedu Radio Amatur, Camau 2 a 3, a oedd wedi’u cynllunio ar gyfer mis Rhagfyr 2024 a mis Mawrth 2025 yn y drefn honno, ac rydym nawr yn disgwyl eu cyflawni yng nghalendr Ch3’2025.

Mae Esblygiad ein Llwyfan Drwyddedu (LPE) yn rhan o raglen ehangach i symleiddio ac awtomeiddio’r ddarpariaeth o drwyddedau sbectrwm. Byddwn yn cyhoeddi rhagor o ddiweddariadau wrth i’r rhain ymddangos ar y dudalen we benodol hon.

Mae ein cynnyrch a’n gweithgareddau trwyddedu presennol yn parhau fel arfer (gan gynnwys y cynnyrch Rhannu Mynediad a Radio Amatur presennol) ac nid effeithir ar y rhain.  Mae’r holl gynnyrch trwydded y gellir gwneud cais amdanynt ar gael yn ein Porth trwyddedau.

Mae disgrifiad llawn o’r penderfyniadau polisi, a’r nodweddion newydd a nodir uchod ar gyfer Rhannu Mynediad, wedi’i restru yn ein Datganiad Mis Gorffennaf 2024 a Datganiad Mis Rhagfyr 2024, ac mae’r rhai ar gyfer y Fframwaith Radio Amatur ar gael yma.

Mae’r amserlenni a ddangosir ar y dudalen we hon yn adlewyrchu ein safbwynt diweddaraf ar argaeledd ers cyhoeddi’r datganiad.

Er ein bod ni wrthi’n gwneud y newidiadau angenrheidiol i wella’r systemau a’r prosesau, mae’n bosibl y bydd yr amseroedd cwblhau yn cael eu heffeithio ychydig o ran ceisiadau am drwyddedau ar gyfer y gwasanaethau a nodir, ac ar gyfer trwyddedau eraill rydym yn eu cyhoeddi. Byddwn yn gwneud ein gorau i leihau’r effaith ar amseroedd cwblhau, ond rydym yn gofyn i randdeiliaid fod yn amyneddgar â ni wrth i ni wneud y newidiadau hyn.

Rydym yn gwerthfawrogi eich amynedd a byddwn yn rhoi’r wybodaeth ddiweddaraf i chi ar y dudalen we hon wrth i ragor o wybodaeth ddod i law.

Byddwn yn cyhoeddi’r diweddariad nesaf ym mis Ionawr. I gael rhagor o wybodaeth, cysylltwch â spectrum.licensing@ofcom.org.uk.

Rydym yn rhoi gwybod i randdeiliaid bod y trydydd cyflwyniad ar gyfer Esblygiad ein Llwyfan Drwyddedu (LPE 3) wedi cael ei ohirio oherwydd materion sydd wedi codi wrth ddatblygu cynnyrch. Mae’r oedi wedi effeithio ar argaeledd ein cam awtomeiddio cyntaf ar gyfer trwyddedau rhannu mynediad, ac mae hefyd wedi arwain at oedi wrth roi ychydig o benderfyniadau polisi eraill ar waith. 

Mae’r penderfyniadau polisi (gohiriedig) yr effeithir arnynt yn cynnwys y rhai a gofnodir yn bennaf yn:

• Diweddaru'r fframwaith trwyddedu radio amatur (Camau 2 a 3);

• Ymestyn mynediad yn y bandiau 26 GHz ar gyfer Rhannu Mynediad; ac
• is-set o’r Gwelliannau arfaethedig ar gyfer Rhannu Mynediad. (Gweler y manylion isod)

Y cynllun gwreiddiol oedd bod LPE 3 ar gael erbyn Ch2 2024 yn y calendr; bellach disgwylir iddo fod ar gael yn Ch2 2025.

Rydym yn edrych ar opsiynau i sicrhau bod trwyddedau Rhannu Mynediad mmWave ar gael gan ddefnyddio proses a wneir â llaw yn gynnar yn 2025, a byddwn yn darparu diweddariadau ychwanegol cyn bo hir.

Ar gyfer y gwelliannau Rhannu Mynediad a nodwyd ym mis Gorffennaf 2024, mae is-set o’r newidiadau wedi cael eu gohirio ac mae newidiadau eraill eisoes wedi cael eu rhoi ar waith.  Mae ein proses gydlynu dechnegol yn dibynnu ar gymorth systemau felly mae newidiadau wedi cael eu gohirio.  Mae’r gofyniad cofrestru terfynellau newydd ar gyfer trwyddedeion pŵer isel dan do ar waith, yn ogystal â’n proses gydlynu newydd sy’n cael ei harwain gan ddefnyddwyr.

Rydym wrthi’n cwblhau ein cynlluniau’n derfynol a byddwn yn rhoi rhagor o fanylion am weithrediad ac amseriad penderfyniadau polisi yr effeithir arnynt ar dudalen we benodol. Bydd bwletin arall yn cael ei anfon ar ôl i’n cynlluniau diweddaraf a’n tudalennau gwe pwrpasol gael eu cwblhau.

Mae ein cynnyrch a’n gweithgareddau trwyddedu presennol yn parhau fel arfer (gan gynnwys y cynnyrch Rhannu Mynediad a Radio Amatur presennol) ac ni effeithir ar y rhain.

Bydd LPE 3 yn cyflwyno gwelliannau sylweddol i’n prosesau trwyddedu. Rydym yn gwerthfawrogi eich amynedd wrth i’n gwaith arno barhau.

I gael rhagor o wybodaeth, cysylltwch â spectrum.licensing@ofcom.org.uk.  

Ar 11 Rhagfyr 2023 fe wnaethom gyhoeddi ein datganiad yn nodi ein penderfyniad i ddiweddaru’r fframwaith trwyddedu radio amatur i sicrhau bod y polisïau a’r trwyddedau’n diwallu anghenion amaturiaid radio heddiw ac yfory, tra’n symleiddio’r broses drwyddedu.

Ochr yn ochr â'r datganiad gwnaethom gyhoeddi Hysbysiad Cyffredinol o'r cynnig i amrywio trwyddedau radio amatur, gan roi rhybudd o’n cynnig i amrywio'r holl drwyddedau radio amatur, yn unol â pharagraffau 6 a 7 o Atodlen 1 i Ddeddf Telegraffiaeth Ddi-wifr 2006 a thelerau ac amodau’r drwydded.

Heddiw rydym wedi cyhoeddi ein Hysbysiad Cyffredinol o'r penderfyniad i amrywio'r holl drwyddedau radio amatur. Mae’r Hysbysiad Cyffredinol hwn yn esbonio’r rhesymau dros ein penderfyniadau ac yn cadarnhau, gyda rhai diwygiadau yn sgil ymatebion rhanddeiliaid i’r ymgynghoriad, y byddwn yn amrywio’r holl drwyddedau radio amatur i weithredu ein cynlluniau i ddiweddaru’r fframwaith trwyddedau radio amatur.

Mae pob trwydded radio amatur i bob pwrpas yn cael ei hamrywio o'r dyddiad heddiw a rhaid i unrhyw ddefnydd o offer radio amatur gydweddu â'r telerau ac amodau newydd ar gyfer y dosbarth o drwydded amatur a ddelir. Cyn bo hir byddwn yn dechrau cysylltu â deiliaid trwyddedau i roi eu dogfennau trwydded newydd iddynt.

Ochr yn ochr â’n Hysbysiad Cyffredinol o benderfyniad, rydym hefyd wedi cyhoeddi fersiwn wedi’i diweddaru o’r Ddogfen Trwyddedu Radio Amatur, fersiwn wedi’i diweddaru o’r Llyfryn Amodau Trwydded Telegraffiaeth Ddi-wifr Radio Amatur, fersiwn wedi’i diweddaru o’r Hysbysiad Cydlynu a fersiwn wedi’i diweddaru o’r ddogfen canllawiau radio amatur.