Mae Ofcom wedi agor ymchwiliad heddiw i fethiant y Post Brenhinol i gyrraedd ei dargedau dosbarthu ar gyfer 2023/24, yn dilyn y cwmni yn cyhoeddi eu canlyniadau y prynhawn yma.
O dan ein rheolau, mae’n rhaid i’r Post Brenhinol gyrraedd targedau perfformiad penodol dros y flwyddyn ariannol gyfan, ac eithrio cyfnod y Nadolig. Ymysg targedau eraill, mae’n rhaid i’r Post Brenhinol wneud y canlynol:
- dosbarthu 93% o bost dosbarth cyntaf o fewn un diwrnod gwaith ar ôl ei gasglu; a
- dosbarthu 98.5% o bost ail ddosbarth o fewn tri diwrnod gwaith ar ôl ei gasglu.
Mae’r Post Brenhinol wedi cydnabod heddiw nad oedd wedi cyrraedd y targedau perfformiad uchod yn 2023/24, gan ei fod wedi gwneud y canlynol:
- dosbarthu 74.5% o bost dosbarth cyntaf o fewn un diwrnod gwaith; a
- dosbarthu 92.4% o bost ail ddosbarth o fewn tri diwrnod gwaith.
Wrth benderfynu a yw’r cwmni wedi mynd yn groes i’w rwymedigaethau, byddwn yn ystyried a fu unrhyw ddigwyddiadau eithriadol – y tu hwnt i reolaeth y cwmni – a allai egluro pam ei fod wedi methu ei dargedau.
Os nad oes esboniad boddhaol ar gael, a’n bod yn penderfynu bod y Post Brenhinol wedi methu â chydymffurfio â’i rwymedigaethau, byddwn yn ystyried a ddylid gosod cosb ariannol.
Llynedd roedd Ofcom wedi rhoi dirwy o £5.6m i’r cwmni am fethu â chyflawni ei dargedau dosbarthu dosbarth cyntaf ac ail ddosbarth rheoleiddiol yn 2022/23.
Nodiadau i olygyddion:
Hanes ansawdd gwasanaeth y Post Brenhinol yn ystod y blynyddoedd diwethaf:
- 2022/23: Fe wnaethom roi dirwy o £5.6m i’r Post Brenhinol.
- 2020/21 a 2021/22: Cafodd pandemig Covid-19 effaith sylweddol, hollbresennol a digynsail ar weithrediadau'r Post Brenhinol.
- 2019/20: Roedd y Post Brenhinol ar y trywydd iawn i gyrraedd ei dargedau cyn Covid-19, a gafodd effaith ar ei weithrediadau dros wythnosau olaf y flwyddyn ariannol. Yn unol â hynny, roeddem yn fodlon bod y cwmni wedi cyflawni ei rwymedigaethau rheoleiddiol.
- 2018/19: Fe wnaethom roi dirwy o £1.5m i’r Post Brenhinol.