Mae'r adroddiad hwn yn edrych ar sut mae TikTok, Twitch a Snap yn amddiffyn plant rhag cyrchu fideos a allai fod yn niweidiol.
Rhaid i lwyfannau rhannu fideos (VSP) sydd wedi'u lleoli yn y DU roi mesurau ar waith i amddiffyn plant rhag dod ar draws fideos a allai amharu ar eu datblygiad corfforol, meddyliol neu foesol. Canfu ein hadroddiad y llynedd fod gan yr holl VSPs sydd wedi hysbysu ni rai mesurau diogelwch ar waith, ond y gallent fod yn gryfach.
Eleni, rydym wedi edrych yn fanylach ar sut mae VSPs yn amddiffyn plant ar-lein. Mae'r adroddiad hwn yn canolbwyntio ar TikTok, Twitch a Snap - tri o'r gwasanaethau rhannu fideos wedi'u rheoleiddio mwyaf poblogaidd ar gyfer plant dan 18 oed. Pa fesurau sydd ganddyn nhw i atal plant rhag dod ar draws niwed, a sut maen nhw'n eu gorfodi a'u profi?
Darllen yr adroddiad
How video-sharing platforms protect children from encountering harmful videos (PDF, 1.0 MB)
Ar 14 Rhagfyr 2023, fe wnaethom agor ymchwiliad i weld a oedd TikTok wedi methu â chydymffurfio â’i ddyletswyddau i ddarparu gwybodaeth mewn ymateb i gais ffurfiol am wybodaeth, mewn modd a bennir gan Ofcom.
Mae Penderfyniad Terfynol nawr wedi cael ei wneud. Mae manylion canlyniad yr ymchwiliad hefyd ar gael yma.
Fel rhan o’r ymchwiliad, ac at ddibenion yr adroddiad ar ddiogelu plant, darparodd TikTok set wedi’i diweddaru o ddata, am y systemau rheolaeth rhieni sydd ganddo ar waith. Dywedodd TikTok wrthym, ym mis Chwefror 2024, fod nifer y defnyddwyr yn eu harddegau yn y DU (defnyddwyr y cofnodwyd eu bod rhwng 13 ac 17 oed ar ei system) gyda Family Pairing ar waith yn cynrychioli rhwng 4-5% o gyfanswm defnyddwyr gweithredol yn eu harddegau misol TikTok yn y DU.
Darparodd TikTok set newydd o ddata sy’n ymwneud â mis Chwefror 2024 o ganlyniad i’r set ddata wedi’i diweddaru a ddaeth o ffynhonnell ddata gyda pholisïau cadw gwahanol. Roedd ein hadroddiad tryloywder wedi cael ei baratoi gan ddefnyddio data o’r cyfnod rhwng 1 Ebrill 2023 a 30 Mehefin 2023. Mae’r data wedi’i ddiweddaru a ddarparwyd gan TikTok yn ystod yr ymchwiliad yn cyfeirio at y cyfnod rhwng 1 Chwefror 2024 a 29 Chwefror 2024.
Fel yr amlinellir yn yr adroddiad -
“Dim ond llwyfannau sydd â chysylltiad perthnasol â’r DU sy’n cael eu rheoleiddio o dan Drefn Llwyfannau Rhannu Fideos y DU. Nid oes llawer o Lwyfannau Rhannu Fideos eraill – gan gynnwys YouTube ac Instagram – yn dod o dan drefn y DU oherwydd eu bod wedi’u lleoli mewn mannau eraill. Felly, nid yw ein canfyddiadau’n cynrychioli’r sector Llwyfannau Rhannu Fideos cyfan, ac nid ydynt chwaith yn dangos bod TikTok, Twitch a Snap yn well nac yn waeth na’r llwyfannau nad ydynt o fewn cwmpas Cyfundrefn Llwyfannau Rhannu Fideos y DU. Ond mae ein hadroddiad yn dangos y dulliau mae llwyfannau wedi’u defnyddio, a’r heriau maen nhw wedi’u hwynebu cyn y drefn diogelwch ar-lein ehangach.” (gweler tudalen 3).