Fframwaith llwyfannau rhannu fideos Ofcom: canllaw i'r diwydiant

Mae'n rhaid i chi roi gwybod i Ofcom os ydych yn wasanaeth fideo ar-lein sy'n caniatáu i ddefnyddwyr uwchlwytho a rhannu fideos gyda'r cyhoedd a'ch bod wedi'ch sefydlu yn y DU.

Gweler yr arweiniad rydym wedi'i gyhoeddi i helpu i asesu a yw eich gwasanaeth yn bodloni'r diffiniad cyfreithiol a'r meini prawf awdurdodaeth, ac i gyflwyno eich hysbysiad ar-lein. Mae'n rhaid i wasanaethau newydd hysbysu Ofcom cyn lansio.

Diogelu defnyddwyr rhag y risg o edrych ar gynnwys niweidiol.

I wneud hyn, mae'n rhaid bod darparwyr VSP wedi rhoi mesurau priodol ar waith
i ddiogelu:

• pob defnyddiwr rhag fideos sy'n debygol o annog trais neu gasineb yn erbyn grwpiau penodol;
• pob defnyddiwr rhag cynnwys a fyddai'n cael ei ystyried yn drosedd o dan gyfreithiau sy'n ymwneud â therfysgaeth;
• yn erbyn deunydd cam-drin plant yn rhywiol; a hiliaeth a senoffobia;
• pobl dan 18 oed rhag fideos sy'n cynnwys pornograffi, cynnwys eithafol a deunydd arall a allai amharu ar eu datblygiad corfforol, meddyliol neu foesol.

Mae'n rhaid cynnal rhai safonau o ran hysbysebu hefyd.

Gweler Adran 3 arweiniad Ofcom ar gyfer darparwyr ar sut i ddiogelu defnyddwyr rhag deunydd niweidiol i gael rhagor o wybodaeth.

Mesurau y gall darparwyr eu cymryd i ddiogelu defnyddwyr rhag deunydd niweidiol

Mesurau i ddiogelu pobl dan 18 oed

• Telerau ac amodau sy'n nodi, os bydd rhywun yn uwchlwytho fideo sy'n cynnwys unrhyw ddeunydd cyfyngedig*, bod yn rhaid iddo gael ei ddwyn at sylw y darparwr VSP.
• Systemau ar gyfer dod o hyd i sicrwydd ynghylch oedran gwylwyr posib.
• Nodweddion rheoli ar gyfer rhieni
• Systemau sy'n caniatáu i wylwyr raddio deunydd niweidiol.

Mesurau sy'n benodol i hysbysebu

• Cynnwys telerau ac amodau ynghylch gofynion hysbysebu ar y llwyfan.
• Darparu'r swyddogaeth i rywun sy'n uwchlwytho fideo ddatgan a yw'r fideo'n cynnwys hysbyseb ai beidio.

Mesurau i gefnogi diogelu pob defnyddiwr

• Cynnwys telerau ac amodau i wahardd uwchlwytho fideos sy'n cynnwys deunydd niweidiol perthnasol.**
• Mecanweithiau i wylwyr adrodd neu dynnu sylw at ddeunydd niweidiol a rhoi esboniadau i ddefnyddwyr am y camau a gymerwyd.
• Proses gwynion
• Offer a gwybodaeth i ddefnyddwyr gyda'r nod o wella eu llythrennedd yn y cyfryngau.

*Mae deunydd cyfyngedig yn cyfeirio at fideos sydd wedi derbyn tystysgrif R18 neu a fyddai'n debygol o dderbyn y fath dystysgrif, neu y gwrthodwyd tystysgrif iddynt neu y mae'n debygol y byddai tystysgrif yn cael ei gwrthod iddynt o dan ganllawiau BBFC. Mae hefyd yn golygu unrhyw ddeunydd arall a allai amharu ar ddatblygiad corfforol, meddyliol neu foesol pobl ifanc o dan 18 oed.

** Mae deunydd niweidiol perthnasol yn cyfeirio at unrhyw ddeunydd sy'n debygol o annog trais neu gasineb yn erbyn grŵp o bobl neu aelod o grŵp o bobl yn seiliedig ar nodweddion penodol. Mae hefyd yn cyfeirio at ddeunydd y byddai ei ddangos yn drosedd o dan ddeddfau gysylltiedig â therfysgaeth; deunydd cam-drin plant yn rhywiol; a hiliaeth a senoffobia.

Ceir rhagor o wybodaeth am beryglon deunydd niweidiol i ddefnyddwyr a'r mesurau diogelu yn y ddeddfwriaeth yn Adran 4 yr arweiniad.

Mae'n rhaid i'r mesurau a gymerir gan ddarparwr fod yn briodol er mwyn diogelu defnyddwyr rhag y categorïau niwed uchod a rhaid iddynt fod yn effeithiol wrth gyflawni'r diben hwn. Nid yw gwasanaethau wedi'u cyfyngu yn y mesurau y maent yn eu cymryd a gallant gymryd camau eraill yn ychwanegol at y rhai a restrir yn y fframwaith cyfreithiol.

Mae'r gyfundrefn VSP hefyd yn ei gwneud yn ofynnol i bob gwasanaeth ddarparu ar gyfer gweithdrefn datrys anghydfod diduedd y tu allan i'r llys ar gyfer datrys anghydfod sy'n gysylltiedig â gweithredu mesurau a phenderfyniadau o ran pa rai o'r mesurau a weithredir ai beidio. (Gweler Adran 5 yr arweiniad).

Mae'n rhaid i ddarparwyr benderfynu a yw mesur yn briodol ar gyfer diogelu defnyddwyr rhag deunydd niweidiol. Mae mesur yn briodol os yw'n ymarferol ac yn gymesur, gan gymryd ffactorau megis natur y deunydd a'r niwed posib y gallai ei achosi, nodweddion defnyddwyr (er enghraifft, pobl dan 18 oed), maint a natur y gwasanaeth, a hawliau a buddiannau cyfreithlon defnyddwyr, darparwyr gwasanaethau a'r cyhoedd i ystyriaeth. (Gweler Adran 6 yr arweiniad).

Rydym yn annog darparwyr VSP yn gryf i roi proses ar waith i asesu a rheoli'r risg o niwed. Credwn mai dyma'r ffordd fwyaf effeithiol i ddarparwyr ddogfennu penderfyniadau i bennu pa fesurau sy'n briodol ar gyfer diogelu defnyddwyr rhag deunydd niweidiol. Bydd hefyd yn helpu darparwyr i ystyried risgiau newydd a rhai sy'n dod i'r amlwg er mwyn asesu a lliniaru (Gweler Adran 6 yr arweiniad).

Mae angen i VSPs a sefydlir yn y DU ddilyn gofynion i ddiogelu defnyddwyr rhag hysbysebu niweidiol a sicrhau bod hysbysebion yn dryloyw i ddefnyddwyr. Gallwch ddarllen mwy am y rheolau hysbysebu yng nghynigion Ofcom ar gyfer rheoleiddio hysbysebu ar VSP. Mae arweiniad terfynol ar y gofynion hysbysebu wedi'u cyhoeddi.

Mae gan Ofcom y pŵer i ymchwilio i amheuaeth o beidio â chydymffurfio a chymryd camau gorfodi os yw darparwr VSP wedi torri ei rwymedigaethau. Er hynny, byddwn fel arfer yn ceisio gweithio gyda darparwyr yn anffurfiol i geisio datrys pryderon cydymffurfio.

Os bydd tor rheol, mae ystod o bwerau sydd ar gael i Ofcom. Mae'n bosib y byddem yn ei gwneud yn ofynnol i'r darparwr VSP gymryd camau penodol i gydymffurfio neu i gywiro'r tor rheol a gallwn hefyd osod cosb ariannol ar ddarparwr. Yn y pen draw, yn yr achosion mwyaf difrifol, mae gan Ofcom y pŵer i atal neu gyfyngu ar wasanaeth.

I gael rhagor o wybodaeth am ddull Ofcom o fonitro a gorfodi, gweler Adran 8 yr arweiniad. Mae camau gorfodi yn dilyn ein Canllawiau Gorfodi. Mae gwybodaeth am gosbau ariannol ar gael yn ein Canllawiau Cosb.

Gall darparwyr yrru e-bost i Ofcom yn vspregulation@ofcom.org.uk os oes ganddynt unrhyw gwestiynau am y gyfundrefn VSP.

Noder na all Ofcom ddarparu cyngor cyfreithiol, a chyfrifoldeb i bob darparwr yw sicrhau eu bod yn cydymffurfio â'r rhwymedigaethau cyfreithiol perthnasol.