Rheoleiddio darlledwyr gwasanaeth cyhoeddus

Mae gan ddarlledu gwasanaeth cyhoeddus hanes hir a balch yn y DU. Mae’n darparu newyddion diduedd a dibynadwy, rhaglenni sy’n cael eu gwneud yn y DU a chynnwys unigryw.

Darlledwyr gwasanaeth cyhoeddus yw'r rheini sy’n darparu gwasanaethau Channel 3, Channel 4, Channel 5, S4C a’r BBC. Er bod pob sianel deledu y BBC yn sianeli gwasanaeth cyhoeddus, dim ond prif sianeli’r darlledwyr eraill sydd â’r statws hwn.

Mae gan Ofcom rai rheolau a chanllawiau sy’n berthnasol i bob darlledwr gwasanaeth cyhoeddus. Rydym hefyd yn monitro pa mor dda maent yn perfformio ac yn cyhoeddi ein canfyddiadau. Daliwch ati i ddarllen i gael rhagor o wybodaeth.

Ar wahân, gallwch hefyd ddod o hyd i wybodaeth sy’n benodol i sut rydym yn rheoleiddio:

• Channel 3;
• Channel 4; a
• Channel 5

Polisïau a chanllawiau pwysig ar gyfer Darlledwyr Gwasanaethau Cyhoeddus

Cynyrchiadau a rhaglenni rhanbarthol

Mae cynhyrchu rhaglenni teledu y tu allan i Lundain yn hanfodol i sector cynhyrchu teledu’r DU. Mae’n helpu i ysgogi buddsoddiad a chreu cyfleoedd gwaith ar draws y wlad.

Er mwyn annog cynyrchiadau teledu yn y gwledydd a’r rhanbarthau, mae Ofcom yn gosod cwotâu ar bob darlledwr gwasanaeth cyhoeddus fel eu bod yn gorfod cynhyrchu cyfran deg o raglenni y tu allan i Lundain. Mae gan drwyddedau’r BBC a Channel 3 gwotâu rhanbarthol hefyd, sy’n golygu bod yn rhaid iddynt wneud rhaglenni sydd o ddiddordeb i bobl yng ngwledydd a rhanbarthau gwahanol y DU.

Rhagor o wybodaeth am raglenni a chynyrchiadau teledu rhanbarthol

Digwyddiadau sydd wedi’u rhestru

Mae ein rheolau ynglŷn â digwyddiadau sydd wedi’u rhestru yn sicrhau bod rhai digwyddiadau o ddiddordeb cenedlaethol (fel digwyddiadau chwaraeon mawr) yn gallu cael eu gwylio gan y gynulleidfa fwyaf bosibl a hynny am ddim.

Dyfodol cyfryngau gwasanaeth cyhoeddus

Mae gan gyfryngau gwasanaeth cyhoeddus (PSM) le unigryw yng nghymdeithas y DU. Mae’n darparu newyddion dibynadwy a chywir, cynnwys sy’n adlewyrchu’r DU gyfan ac sy’n dod â chynulleidfaoedd at ei gilydd. Ond, wrth i ddefnydd cynulleidfaoedd barhau i symud ar-lein, mae risgiau difrifol i swmp y cynnwys cyfryngau gwasanaeth cyhoeddus a ddarperir yn y dyfodol yng ngoleuni’r heriau ariannol sy’n wynebu darlledwyr gwasanaeth cyhoeddus. 

Mae llawer o’r argymhellion a wnaethom yn ein hadolygiad diwethaf o gyfryngau gwasanaeth cyhoeddus – sgrin fach: trafodaeth fawr – wedi cael eu mabwysiadu yn Neddf Cyfryngau 2024. Rydym yn croesawu’r diwygiad rheoleiddio hanfodol hwn, ond mae cyflymder y newid yn golygu ei bod yn hanfodol ein bod yn parhau i asesu pa ddiwygiadau pellach y gallai fod eu hangen i ddiogelu cyfryngau gwasanaeth cyhoeddus hanfodol ar gyfer cynulleidfaoedd yn y DU.

Mae’r ddogfen hon yn nodi cylch gorchwyl ein hadolygiad nesaf o gyfryngau gwasanaeth cyhoeddus. Bydd cam cyntaf yr adolygiad yn egluro sut mae’r darlledwyr gwasanaeth cyhoeddus wedi cyflawni ar gyfer cynulleidfaoedd y DU dros y pum mlynedd diwethaf ac yn edrych ar yr heriau i’w ddarpariaeth dros y degawd nesaf a’r tu hwnt. Bydd yr ail gam yn ystyried cyfleoedd i gefnogi cynaliadwyedd cyfryngau gwasanaeth cyhoeddus yn y dyfodol ac argaeledd newyddion cywir o ansawdd uchel y gall cynulleidfaoedd ymddiried ynddynt.

Adroddiadau ac adolygiadau eraill