Cyfarfu Panel Cronfa Radio Cymunedol Ofcom ('y Panel') ddydd Mawrth 7 Chwefror 2023 i ystyried ceisiadau yn yr ail rownd gyllido ar gyfer y flwyddyn ariannol 2022-23.
Bu i'r Panel ystyried pob cais a dyfarnu cyllid yn seiliedig ar yr wybodaeth a ddarparwyd, a chan gyfeirio at nodiadau arweiniad y Gronfa Radio Cymunedol ('y Gronfa'). Ar gyfer pob cais am grant, penderfynodd y Panel a oedd am roi dyfarniad llawn, dyfarniad rhannol neu beidio â dyfarnu unrhyw gyllid o gwbl.
Yn y cyfarfod:
- Ystyriwyd 46 o geisiadau am grant;
- Y cyfanswm cyllid y gofynnwyd amdano yn y ceisiadau hyn oedd £854,085
- Dyfarnwyd grantiau i 17 o ymgeiswyr, cyfanswm o £251,421 ac
- Ni ddyfarnwyd grant i 29 o ymgeiswyr.
Amrywiodd y grantiau a ddyfarnwyd o £1,500 hyd at £24,570 ar gyfer swyddi unigol, gyda swm cyfartalog o £14,789. Ceir crynodeb o'r dyfarniadau ar ddiwedd y datganiad hwn.
Mae'r Panel yn ystyried, gymaint ag sy’n bosib, y dylai grantiau gan y Gronfa helpu i ddatblygu sefydlogrwydd ariannol a chynaladwyedd yn y dyfodol. Felly, roedd cynigion i hyrwyddo sefydlogrwydd ariannol hir dymor a swyddi a allai ddatblygu i fod yn hunangynhaliol wedi'u ffafrio gan y Panel dros geisiadau am rolau cymorth eraill.
Mewn perthynas â'r ceisiadau a ystyriwyd yn y rownd gyllido hon, hoffai'r Panel wneud y pwyntiau a ganlyn:
Adborth
Nid yw'r Panel yn darparu adborth unigol fel mater o drefn. Bydd adborth ar gael ar lafar, os yw gorsafoedd am gysylltu ag Ofcom. Byddai'r Panel yn argymell yn gryf i orsafoedd ofyn am adborth os byddant yn ailgyflwyno ceisiadau am yr un swydd neu brosiect yn y dyfodol. Yn y rownd hon roedd y Panel eisoes wedi gwrthod un cais ar dri achlysur blaenorol.
Darllen y nodiadau arweiniad
Gofynnodd nifer fach o orsafoedd am grantiau ar gyfer eitemau fel gwariant cyfalaf, er i'r arweiniad egluro nad yw'r Gronfa'n cefnogi'r fath geisiadau.
Darparwch yr holl wybodaeth y gofynnir amdani
Mae'r ffurflen gais safonol yn esbonio'n glir y dylid cynnwys disgrifiad swydd, wrth wneud cais am gyllid ar gyfer swydd. Methodd rhai ymgeiswyr â darparu'r wybodaeth y gofynnwyd amdani, gan gynnwys disgrifiadau swydd a gwybodaeth ariannol. Dylai ymgeiswyr gyfeirio at y nodiadau arweiniad am ragor o fanylion ynghylch yr hyn y dylid ei ddarparu.
Eglurder ynghylch swyddi
Wrth wneud cais am gyllido swydd, dylai ymgeiswyr esbonio sut y maent wedi pennu'r cyflog arfaethedig. Methodd nifer fach o ymgeiswyr â nodi a oedd swyddi'n amser llawn neu'n rhan-amser, neu a oedd y swm arfaethedig yn cynnwys Yswiriant Gwladol, taliadau pensiwn etc.
Anogir ymgeiswyr i ystyried costau tebygol ar adeg y gyflogaeth hefyd. Er enghraifft, seiliodd nifer o ymgeiswyr eu costau cyflog arfaethedig ar y Cyflog Byw Cenedlaethol, ond byddai'r ffigurau a ddefnyddiwyd wedi dyddio ar adeg penodi i'r rôl.
Ffocws clir ar gyfer swyddi
Ffafriodd y Panel geisiadau am swyddi yr oedd eu disgrifiadau swydd yn dangos ffocws. Y ceisiadau aflwyddiannus oedd y rhai lle'r oedd gan ddeiliad y swydd ystod anferth o gyfrifoldebau gan gynnwys rheoli gwirfoddolwyr, rhaglennu a hyd yn oed cyflwyno rhaglenni dyddiol, ochr yn ochr â datblygu refeniw. Roedd y rhain yn aml yn geisiadau ar gyfer swyddi Rheolwr Gorsaf. Roedd y Panel yn annhebygol o ffafrio'r fath geisiadau gan nad oedd deiliad y swydd yn debygol o fedru neilltuo digon o amser i gynhyrchu incwm, gan wneud y buddsoddiad yn anghynaliadwy.
Ceisiadau am ailgyllido
Gwnaeth nifer fach o orsafoedd geisiadau am gyllid estynedig ar gyfer swyddi a gyllidwyd yn flaenorol. Mae'r Panel yn gwneud penderfyniadau yn seiliedig ar y dystiolaeth a ddarperir gan bob ymgeisydd. Mewn ceisiadau am ailgyllido, byddai'r Panel yn disgwyl gweld tystiolaeth fel perfformiad deiliad y swydd hyd yma (gan gynnwys incwm a godwyd, er enghraifft).
Eglurder ynghylch sefyllfa ariannol yr orsaf
Roedd rhai ceisiadau'n cynnwys gwybodaeth ariannol a oedd i'w gweld yn dangos cronfeydd wrth gefn anghyfyngedig mawr neu elw masnachu sylweddol o flynyddoedd blaenorol. Yn ddoeth, bu i rai ymgeiswyr ddarparu gwybodaeth naratif am y fath eitemau ond bu i rai eraill fethu â'i gwneud. Dylai ymgeiswyr fod yn ymwybodol y gallai unrhyw diffyg eglurder o bosib beri anfantais i'w cais, gan y gall roi argraff gamarweiniol o'u cyflwr ariannol. Nododd y Panel hefyd fod rhai gorsafoedd yn rhan o sefydliadau ehangach a allai gynnig cymorth ariannol iddynt; nid oedd rhai gorsafoedd yn glir ynghylch eu perthynas â'r sefydliadau mwy hyn.
Gwerthwch eich straeon llwyddiant
Roedd y Panel yn mwynhau darllen ceisiadau a fu'n disgrifio'r orsaf yn gryno ac yn effeithiol, yn enwedig y gorsafoedd hynny a oedd yn gallu dangos eu gwaith rhagorol a'u gwerth cymdeithasol.
| Gorsaf | Diben | Swm a ddyfarnwyd |
|---|---|---|
| Calon FM | Swyddog Ymgysylltu Cymunedol | £16,000 |
| Jambo Radio | Rheolwr Twf | £23,188 |
| CamGlen Radio | Gweithiwr Digwyddiadau | £13,874 |
| Embrace | Rheolwr Datblygu Busnes | £24,570 |
| Flex FM | Rheolwr Datblygu Busnes | £20,500 |
| Radio Wimborne | Hyfforddwr | £1,500 |
| Tone FM | Rheolwr Datblygu Busnes ac Ymgysylltu | £16,000 |
| Wey Valley Radio | Asiantaeth Farchnata Allanol | £4,000 |
| Awaaz FM | Rheolwr Datblygu Busnes | £16,255 |
| Black Country Radio | Swyddog Gwerthiannau | £15,000 |
| Cannock Chase Radio | Swyddog Allgymorth Cymunedol a Chodi Arian | £14,876 |
| Cross Rhythms Plymouth | Sefydliad Codi Arian Allanol | £9,180 |
| Future Radio | Cydlynydd Gwerthu Hysbysebu | £17,935 |
| Hillz FM | Swyddog Datblygu | £10,875 |
| Oldham Community Radio | Rheolwr Datblygu Technegol a Chynaladwyedd | £10,656 |
| Platform B | Rheolwr Busnes Cymunedol a Phartneriaethau | £22,477 |
| Sheppey FM | Rheolwr Hyfforddi Ieuenctid | £14,535 |