Datganiad: Gwella cysylltedd symudol o’r awyr a’r gofod

Ym mis Gorffennaf 2024, fe wnaethom gyhoeddi Cais am Fewnbwn (CFI) yn gofyn am safbwyntiau rhanddeiliaid ar y cyflenwad a’r galw posibl am wasanaethau lloeren uniongyrchol i ddyfais (“D2D”) i ffonau symudol a gwasanaethau lloeren symudol (MSS) yn y DU, a’r gofynion sbectrwm cysylltiedig.

Yn y Cais am Fewnbwn fe wnaethom:

1. nodi datblygiadau yn y diwydiant, gan gynnwys sut mae gwasanaethau D2D newydd wedi esblygu o dwf y farchnad MSS a datrysiadau technoleg newydd, a sut mae cymwysiadau D2D wedi ehangu o achosion defnydd penodol i gynigion marchnad dorfol;
2. nodi’r potensial ar gyfer systemau Platfform Uchel (HAPs) i gefnogi gwasanaethau tebyg;
3. trafod manteision posibl gwasanaethau D2D, gan gynnwys ymestyn darpariaeth symudol y tu hwnt i’r hyn a ddarperir gan y rhwydweithiau daearol presennol, mwy o gadernid rhwydwaith, ac arloesi ar draws nifer o sectorau, gan gynnwys darparu cysylltedd ar gyfer dyfeisiau’r Rhyngrwyd Pethau (IoT);
4. nodi’r defnydd presennol a chynyddol o sbectrwm MSS ar gyfer amrywiaeth o wasanaethau cyfathrebu a gofyn am farn ynghylch a yw awdurdodiadau presennol Ofcom yn dal yn addas;
5. trafod y defnydd presennol o sbectrwm MMS 2 GHz, gan nodi y byddwn yn adolygu’r defnydd presennol o’r sbectrwm hwn gan fod yr awdurdodiadau presennol i fod i ddod i ben yn 2027;
6. nodi ein syniadau cynnar ynghylch dulliau rheoli ac awdurdodi sbectrwm posibl ar gyfer yr uchod.

Cawsom 29 o ymatebion: 25 heb fod yn gyfrinachol a 4 yn gwbl gyfrinachol. Roedd yr ymatebwyr yn cynnwys Gweithredwyr Rhwydweithiau Symudol (MNOs), gweithredwyr lloeren, darparwyr D2D, cyrff amrywiol y llywodraeth, darparwyr gwasanaethau’r Rhyngrwyd Pethau, a sefydliadau eraill sydd â diddordeb. Mae’r ddogfen hon yn darparu crynodeb o'r ymatebion. Bwriad y crynodeb hwn o ymatebion yw rhoi syniad cyffredinol o’r amrywiaeth o ymatebion sydd wedi dod i law. Yn y ddogfen hon, nid ydym yn rhoi barn ar rinweddau, na sylwedd yr ymatebion fel arall.