Ymchwiliad i ansawdd perfformiad gwasanaeth y Post Brenhinol yn 2023/24

Ar ôl ystyried y dystiolaeth, mae Ofcom heddiw wedi cyflwyno Penderfyniad i’r Post Brenhinol sy’n canfod ei fod wedi mynd yn groes i amod 1.9.1 y Darparwr Gwasanaeth Cyffredinol Dynodedig (DUSP) drwy beidio â chyrraedd y targedau cenedlaethol ar gyfer post dosbarth cyntaf ac ail ddosbarth yn ystod 2023/24. Rydym hefyd wedi penderfynu rhoi cosb ariannol i’r Post Brenhinol am y tor-amod hwn. 

Mae gan Ofcom ddisgresiwn i addasu mesur perfformiad y Post Brenhinol i ystyried effaith digwyddiadau sy’n eithriadol ym marn Ofcom, ac sydd wedi effeithio ar ei berfformiad. Fodd bynnag, at ddibenion yr ymchwiliad hwn, nid oeddem yn credu ei bod yn briodol gwneud addasiadau o’r fath.

Mae hyn yn golygu, gan gynnwys y cyfwng hyder, bod y Post Brenhinol wedi:

• Cyflawni 74.7% yn erbyn targed o 93% ar gyfer post Dosbarth Cyntaf, sy’n golygu ei fod 18.3 pwynt canran yn is na’r targed Dosbarth Cyntaf.
• Cyflawni 92.7% yn erbyn targed o 98.5% ar gyfer post Ail Ddosbarth, sy’n golygu ei fod 5.8 pwynt canran yn is na’r targed Ail Ddosbarth.

Er bod gwelliannau i’w croesawu ym mherfformiad y Post Brenhinol rhwng mis Ionawr a mis Mawrth 2024 (chwarter olaf y cyfnod), nid oedd hyn yn ddigon i atal tor-amod sylweddol. Yn y pen draw, roedd hyn yn golygu bod defnyddwyr wedi cael gwasanaeth annibynadwy o ansawdd gwael, nad oedd wedi gwella fawr ddim o’i gymharu â pherfformiad y flwyddyn flaenorol – blwyddyn lle cafwyd aflonyddwch sylweddol, gan gynnwys 18 diwrnod o streicio.

Mae cydymffurfio â thargedau perfformiad yn fater difrifol iawn i Ofcom ac mae wedi rhoi cosb ariannol o £10.5 miliwn i’r Post Brenhinol. Rydym yn credu bod y gosb hon, a gafodd ei gosod yn unol â’n Canllawiau Cosbau, yn briodol ac yn gymesur, ac y bydd yn rhoi cymhelliant clir i’r Post Brenhinol wella canlyniadau i ddefnyddwyr yn gyson. O leiaf, rydym yn disgwyl gweld cynllun clir a chredadwy a gaiff ei rannu’n gyhoeddus, sy’n nodi sut bydd y Post Brenhinol yn mynd ati i wella. Yn ymarferol, mae hyn yn golygu cyflawni gwelliannau ystyrlon, cynaliadwy a pharhaus.

Mae swm y gosb yn cynnwys gostyngiad o 30% o’r gosb y byddai Ofcom wedi’i gosod fel arall. Mae’r gostyngiad yn adlewyrchu bod y Post Brenhinol wedi cyfaddef ei atebolrwydd ac wedi cytuno i setlo, sydd wedi galluogi Ofcom i ddod â’r mater hwn i ben yn gyflymach.

Ceir rhagor o fanylion yn ein canolfan newyddion.

Bydd fersiwn heb fod yn gyfrinachol o’n penderfyniad yn cael ei gyhoeddi cyn bo hir.