Heddiw, mae Ofcom wedi agor ymchwiliad i weld a yw’r darparwr rhwydwaith band eang BRSK wedi methu ymgynghori ag awdurdod cynllunio lleol cyn gosod polion telegraff.
O dan y Cod Cyfathrebiadau Electronig, mae cwmnïau telegyfathrebiadau dynodedig yn elwa o weithdrefnau cynllunio symlach sydd wedi’u dylunio i hwyluso’r gwaith o gyflwyno rhwydweithiau symudol a band eang gwell. Fodd bynnag, mae’n rhaid iddynt gydymffurfio ag amodau penodol a nodir yn y Rheoliadau Cyfathrebiadau Electronig a gyhoeddwyd gan y Llywodraeth.
Ar ôl i gŵyn ddod i law, rydym yn ymchwilio i weld a yw BRSK wedi methu cydymffurfio â’i rwymedigaethau o dan y Rheoliadau Cyfathrebiadau Electronig i ymgynghori ag awdurdod cynllunio lleol, a rhoi 28 diwrnod o rybudd ysgrifenedig i awdurdod cynllunio lleol cyn gosod polion telegraff yn ardal Birmingham.
Mae’r gofyniad i ymgysylltu ag awdurdodau cynllunio yn rhan bwysig o’r rheoliadau hyn, gan ei fod yn sicrhau bod y darparwr yn cael gwybodaeth briodol am bryderon lleol ac yn rhoi rhywfaint o gydbwysedd i’r gweithdrefnau cynllunio symlach.
Er y gall darparwr, yn gyfreithiol, barhau i osod polyn telegraff, drwy’r gwaith ymgysylltu hwn gall awdurdodau cynllunio dynnu sylw’r darparwr at ystyriaethau lleol perthnasol – fel peryglon posibl neu bryderon ynghylch amwynder gweledol – a gosod amodau priodol (heb fod yn rhwymol) y maent am i’r darparwr gydymffurfio â nhw.
Byddwn yn rhoi’r wybodaeth ddiweddaraf am yr ymchwiliad hwn maes o law.