Datganiad: Diogelu pobl rhag niwed anghyfreithlon ar-lein

Heddiw, rydym yn cyhoeddi ein Datganiad polisi mawr cyntaf ar gyfer y drefn Diogelwch Ar-lein. 

Mae’r penderfyniad hwn ar y Codau a’r canllawiau Niwed Anghyfreithlon yn garreg filltir bwysig, gyda darparwyr ar-lein bellach yn gorfod diogelu eu defnyddwyr yn gyfreithiol rhag niwed anghyfreithlon. 

Cyhoeddodd Ofcom gynigion am y camau y dylai darparwyr eu cymryd i fynd i’r afael â niwed anghyfreithlon ar eu gwasanaethau yn fuan ar ôl pasio’r Ddeddf Diogelwch Ar-lein ym mis Hydref 2023. Ers hynny, rydym wedi bod yn ymgynghori’n ofalus ac yn eang, gan wrando ar ddiwydiant, elusennau ac ymgyrchwyr, rhieni a phlant, yn ogystal â chyrff arbenigol ac asiantaethau gorfodi’r gyfraith. Gyda chyhoeddiad heddiw,¹, mae’n rhaid i ddarparwyr ar-lein gymryd camau i ddechrau cydymffurfio â’r rheolau newydd hyn. Y canlyniad fydd bywyd mwy diogel ar-lein i bobl yn y DU, yn enwedig plant. 

Mae gan ddarparwyr ddyletswydd nawr i asesu’r risg o niwed anghyfreithlon ar eu gwasanaethau, gyda dyddiad cau o 16 Mawrth 2025. Yn amodol ar y Codau’n cwblhau’r broses Seneddol, o 17 Mawrth 2025 ymlaen, bydd angen i ddarparwyr gymryd y mesurau diogelwch a nodir yn y Codau neu ddefnyddio mesurau effeithiol eraill i ddiogelu defnyddwyr rhag cynnwys a gweithgarwch anghyfreithlon. Rydym yn barod i gymryd camau gorfodi os nad yw darparwyr yn gweithredu’n brydlon i fynd i’r afael â’r risgiau sydd ar eu gwasanaethau. 

Mae hyn yn cael ei amlinellu ymhellach yn ein dogfen Trosolwg.

Gwneud ein dogfennau’n hygyrch

Hoffem ddiolch i’r nifer fawr o randdeiliaid – o gymdeithas sifil, gwasanaethau o bob maint, arbenigwyr, a chyrff eraill yn y sector cyhoeddus – sydd wedi rhoi o’u hamser i ymgysylltu â’n cynigion. 

Rydym yn rheoleiddiwr sy’n seiliedig ar dystiolaeth, ac rydym wedi archwilio ymatebion rhanddeiliaid ac ymchwil perthnasol yn drylwyr cyn nodi’r rhesymeg dros ein penderfyniadau. Mae hon wedi bod yn dasg fawr i’w chyflawni, gyda mwy na 130 o droseddau blaenoriaeth a 100K a mwy o wasanaethau o fewn cwmpas ein gwaith rheoleiddio.  

Mae hyd a lled a chymhlethdod y drefn newydd hon yn golygu bod y ddogfen rydym yn ei chyhoeddi heddiw yn berthnasol i lawer o feysydd. Rydym felly wedi cymryd camau i’w gwneud mor hygyrch â phosibl, gan gynnwys: 

• Crynodeb o’n penderfyniadau a’r gwasanaethau defnyddiwr i ddefnyddiwr a’r gwasanaethau chwilio maent yn berthnasol iddynt.
• Crynodeb o bob pennod, gan nodi’r hyn mae’n ymwneud ag ef, yr adborth a gafwyd gan randdeiliaid, a’n penderfyniadau. 

Rydym hefyd yn awgrymu dogfennau penodol y gallai gwahanol randdeiliaid fod â diddordeb ynddynt:

1. Darparwyr gwasanaethau bach/canolig eu maint: efallai byddant eisiau dechrau gyda’n hadnodd digidol pan fydd ar gael ac adolygu ein dogfennau cryno lle bo hynny’n briodol, cyn troi at ein canllawiau asesu risg, wedi’u dilyn gan ein Codau (wedi’u hategu gan ein dogfennau canllaw eraill).
2. Sefydliadau cymdeithas sifil: efallai y bydd ganddynt ddiddordeb arbennig yn y rhesymeg dros ein penderfyniadau, gan ddechrau gyda’r Trosolwg, a’r crynodebau o benodau. Efallai y byddant yn gweld meysydd o ddiddordeb penodol i’w darllen yn fanylach, er enghraifft ymchwil ar niwed penodol neu wybodaeth am fesurau penodol.
3. Darparwyr gwasanaethau mawr: maent yn fwyaf tebygol o fod eisiau defnyddio cyfuniad o’n holl ddeunyddiau, gan gynnwys yr adnodd digidol, ond rydym yn disgwyl iddynt ganolbwyntio i ddechrau ar y canllawiau asesu risg, y Codau a’r dogfennau canllaw eraill eu hunain.
4. Unigolion mewn darparwyr gwasanaethau:
   1. Mae’n bosibl iawn y bydd cyfreithwyr cydymffurfio eisiau canolbwyntio ar ein Codau a’n dogfennau canllaw, yn enwedig ein canllawiau asesu risg.
   2. Efallai y bydd gweithwyr ymddiriedaeth a diogelwch eisiau canolbwyntio ar y Gofrestr Risgiau, Codau ar gymedroli cynnwys a chymedroli chwilio, a’r ICJG.
5. Unigolion sydd â diddordeb ehangach mewn diogelwch ar-lein: Efallai byddant eisiau dechrau gyda’r Trosolwg a’r crynodeb o’n penderfyniadau.