Mae Ofcom wedi rhoi’r wybodaeth ddiweddaraf am ein cynnydd ers i’r Ddeddf Diogelwch Ar-lein ddod yn gyfraith
Mae’r Ddeddf yn rhoi cyfrifoldeb cyfreithiol ar gwmnïau sydd ag ystod eang o wasanaethau ar-lein i gadw pobl, yn enwedig plant, yn ddiogel ar-lein. Mae gan y cwmnïau hyn ddyletswyddau newydd i ddiogelu defnyddwyr yn y DU drwy asesu risgiau o niwed a chymryd camau i fynd i’r afael â nhw. Mae’r rheolau newydd yn berthnasol i’r holl wasanaethau sydd o fewn y cwmpas ac sydd â nifer sylweddol o ddefnyddwyr yn y DU neu sy’n targedu marchnad y DU, waeth lle maen nhw wedi'u lleoli.
Rydym wedi symud yn gyflym i ddechrau gweithredu’r Ddeddf, gan lansio ein hymgynghoriad ar niwed anghyfreithlon ar-lein ym mis Tachwedd 2023, ac fe’i dilynwyd ym mis Rhagfyr 2023 gan ganllawiau drafft ar gyfer gwasanaethau pornograffi ar-lein ar sut y dylent ddefnyddio sicrwydd oedran effeithiol iawn fel nad yw plant fel arfer yn gallu dod ar draws deunydd pornograffig. Ym mis Mai 2024, fe wnaethom gyhoeddi cynigion ar gyfer sut y dylai gwasanaethau fynd i’r afael â’u dyletswyddau newydd yn ymwneud â chynnwys sy’n niweidiol i blant.
O ddechrau 2024 ymlaen, bydd angen i wasanaethau weithredu i gydymffurfio â’u dyletswyddau
Bydd Ofcom yn cyhoeddi Codau Ymarfer a chanllawiau ar sut gall cwmnïau o fewn y cwmpas gydymffurfio â’u dyletswyddau.
Cam un: niwed anghyfreithlon
Byddwn yn cyhoeddi ein datganiad Niwed Anghyfreithlon ym mis Rhagfyr 2024. Bydd hyn yn cynnwys argraffiad cyntaf y Codau Ymarfer ar Niwed Anghyfreithlon, a’r canllawiau ar asesu risg cynnwys anghyfreithlon. Ar hyn o bryd, mae’n rhaid i bob darparwr gwasanaethau sydd o fewn cwmpas y Ddeddf gwblhau ei asesiadau erbyn canol mis Mawrth 2025. Ar ôl i’r Codau Ymarfer fynd drwy’r Senedd Brydeinig, bydd angen i ddarparwyr gwasanaethau gymryd y camau a nodir yn y Codau neu ddefnyddio mesurau effeithiol eraill i ddiogelu defnyddwyr a gall Ofcom gymryd camau gorfodi yn erbyn achosion o beidio â chydymffurfio. Rydym yn disgwyl y bydd modd gorfodi’r dyletswyddau niwed anghyfreithlon tua mis Mawrth 2025.
Ochr yn ochr â’n datganiad ar Niwed Anghyfreithlon ym mis Rhagfyr 2024, byddwn hefyd yn cyhoeddi ein canllawiau gorfodi terfynol, a’n canllawiau cadw cofnodion ac adolygu terfynol. Rydym hefyd yn bwriadu lansio ymgynghoriad pellach sy’n adeiladu ar y sylfeini a sefydlwyd yn y Codau cyntaf yn ystod gwanwyn 2025.
Cam dau: diogelwch plant, pornograffi, ac amddiffyn menywod a merched
Ym mis Ionawr 2025, byddwn yn cyhoeddi ein canllawiau sicrwydd oedran terfynol ar gyfer cyhoeddwyr cynnwys pornograffig. Rydym yn disgwyl y bydd modd gorfodi’r dyletswyddau hyn sy’n berthnasol i ddarparwyr rhan 5 tua’r un pryd, a byddwn yn dechrau monitro cydymffurfiad.
Byddwn yn cyhoeddi ein canllawiau terfynol ar asesiadau mynediad plant ym mis Ionawr 2025. Bydd darparwyr gwasanaethau wedyn yn cael tri mis i gwblhau’r broses asesu mynediad i blant. Rhaid i wasanaethau sy’n debygol o gael eu defnyddio gan blant wedyn gynnal asesiad risg plant o fewn tri mis i ni gyhoeddi ein Codau Amddiffyn Plant a’n canllawiau asesu risg ym mis Ebrill 2025. Dylai’r gwasanaethau hynny baratoi i gwblhau eu hasesiadau risg plant erbyn mis Gorffennaf 2025. Rydym yn disgwyl y bydd modd gorfodi’r dyletswyddau diogelwch amddiffyn plant tua mis Gorffennaf 2025.
Ym mis Chwefror 2025, byddwn yn cyhoeddi ein canllawiau drafft ar amddiffyn menywod a merched, yn cynnwys cyngor ar gynnwys a gweithgarwch sy’n effeithio’n anghymesur ar fenywod a merched, ac ar asesu a lleihau’r risg o niwed iddynt.
Cam tri: categoreiddio a dyletswyddau ychwanegol i wasanaethau wedi’u categoreiddio
Bydd cyfran fach o wasanaethau wedi’u rheoleiddio yn cael eu dynodi’n wasanaethau Categori 1, 2A neu 2B os ydynt yn bodloni trothwyon penodol a nodir mewn is-ddeddfwriaeth a wneir gan y Llywodraeth. Mae ein cam gweithredu terfynol yn canolbwyntio ar ofynion ychwanegol sydd ond yn berthnasol i’r gwasanaethau hyn sydd wedi’u categoreiddio.
Y cam nesaf yw i’r Llywodraeth Brydeinig gadarnhau’r trothwyon ar gyfer categoreiddio mewn is-ddeddfwriaeth, a disgwyliwn i hyn ddigwydd erbyn diwedd 2024. Rydym wedi ailflaenoriaethu ein gwaith ar y dyletswyddau ar wasanaethau wedi’u categoreiddio i sicrhau ein bod yn cyflawni’n gyflymaf yn y meysydd rydym yn disgwyl y byddant yn arbennig o fuddiol o ran diogelu defnyddwyr ar ôl i’r trothwyon gael eu cadarnhau. Rydym yn disgwyl:
- cyhoeddi’r gofrestr o wasanaethau wedi’u categoreiddio yn ystod haf 2025,
- cyhoeddi hysbysiadau tryloywder drafft o fewn ychydig wythnosau i gyhoeddi’r gofrestr, a chyhoeddi hysbysiadau tryloywder terfynol yn fuan wedyn,
- cyhoeddi cynigion drafft am y dyletswyddau ychwanegol ar wasanaethau sy’n cael eu categoreiddio erbyn dechrau 2026 fan bellaf.
Darllen y diweddariad llawn
Map gwreiddiol (2023)
Dull Ofcom o roi’r Ddeddf Diogelwch Ar-lein ar waith
Diweddariad – beth sydd wedi newid ers cyhoeddi ein map (15 Mehefin 2023)
Gwnaethom gyhoeddi diweddariad ar sut mae Ofcom yn paratoi i reoleiddio diogelwch ar-lein, gan gynnwys amserlenni disgwyliedig a'r hyn sydd wedi newid ers i ni gyhoeddi ein map.