Am y tro cyntaf, mae llai na hanner pobl ifanc 16-24 oed yn gwylio teledu darlledu mewn wythnos arferol, yn ôl astudiaeth flynyddol Ofcom o arferion cyfryngau’r wlad.
Dim ond 48% o gynulleidfaoedd ifanc fu’n gwylio mewn wythnos gyffredin y llynedd, sef gostyngiad o’r 76% yn 2018. Mae plant 4-15 oed yn troi draw ar gyfradd debyg, gyda dim ond 55% yn gwylio teledu darlledu bob wythnos yn 2023, o’i gymharu ag 81% yn 2018. Yn gyffredinol, roedd cyrhaeddiad wythnosol teledu traddodiadol wedi gostwng yn fwy nag erioed yn ystod y flwyddyn ddiwethaf.
Nid gwylio teledu darlledu yn llai aml yn unig y mae cynulleidfaoedd iau rhwng 16 a 24 oed, maent hefyd yn gwylio am gyfnodau byrrach, am ddim ond 33 munud y dydd – i lawr 16% o'r naill flwyddyn i’r llall. O’r rhain, 20 munud yn unig sy’n cael ei dreulio’n gwylio teledu byw.
O’i gymharu, maent yn treulio deirgwaith yn fwy o amser y dydd (1 awr 33 munud) yn gwylio llwyfannau rhannu fideos fel TikTok a YouTube.
Dyma rai canfyddiadau eraill:
Teledu a fideo
- Yn gyffredinol, roedd pobl yn y DU yn gwylio mwy o gynnwys teledu a fideo gartref yn 2023, ar gyfartaledd 4 awr a 31 munud y dydd (i fyny o 6 munud/2% ers 2022). Cafodd hyn ei sbarduno’n bennaf gan gynnydd yn lefelau gwylio dyddiol llwyfannau rhannu fideos (i fyny 12% i 49 munud) ac i wasanaethau fideo ar-alw darlledwyr, fel iPlayer ac ITVX (i fyny 29% i 20 munud).
- Mae sgriniau teledu yn prysur ddod yn fwy poblogaidd ar gyfer gwylio cynnwys YouTube. Mae tri deg pedwar y cant o’r amser a dreulir yn gwylio YouTube gartref bellach yn digwydd ar set deledu – i fyny o 29% yn 2022. Mae hyn yn cynyddu i 45% ymysg plant 4-15 oed – i fyny o 36% yn 2022.
- Roedd gwylio gwasanaethau fideo ar-alw drwy danysgrifio (SVoD) yn ddyddiol wedi gweld twf mwy ymylol yn 2023 (i fyny 6% i 38 munud). Netflix yw’r gwasanaeth mwyaf poblogaidd o hyd – mae’n cael ei wylio am 21 munud y pen bob dydd ar gyfartaledd, a dyma mwy na hanner yr holl wylio sy’n digwydd ar fideo ar-alw drwy danysgrifio.
Radio
- Yn ystod chwarter cyntaf 2024 gwelwyd y nifer uchaf o wrandawyr radio wythnosol ar draws pob dyfais yn ystod yr ugain mlynedd diwethaf (ychydig o dan 50 miliwn). Mae’r amser gwrando hefyd yn cynyddu o’r naill flwyddyn i’r llall, i 20.5 awr yr wythnos ar gyfartaledd.
- Mae llawer o hyn wedi digwydd oherwydd llwyddiant parhaus radio masnachol – mae ychydig dros saith o bob 10 o bobl 15 oed a hŷn yn gwrando ar orsafoedd masnachol o leiaf unwaith yr wythnos (70.4%) o’i gymharu â 55.6% ar gyfer gorsafoedd y BBC.
- Mae gwrando ar radio ar-lein yn dal i dyfu’n gyson, gan oddiweddyd radio analog (AM/FM) am y tro cyntaf eleni ac erbyn hyn dyma dros chwarter (28%) yr holl oriau radio byw, yn bennaf drwy seinyddion clyfar.
Mae Ofcom hefyd wedi llunio adroddiadau ar wahân sy’n edrych ar arferion cyfryngau pobl yng Nghymru, Gogledd Iwerddon a’r Alban.