Bwrdd Ofcom

Mae Michael Grade wedi cael gyrfa hir ym maes darlledu, gan gynnwys gyda London Weekend Television, y BBC, ITV a Channel 4. Mae wedi bod yn gadeirydd ar Stiwdios Ffilm Shepperton/Pinewood, y BBC ac ITV. Mae’n gyd-sylfaenydd y cwmni GradeLinnit, sy’n cynhyrchu ar gyfer y theatr.

Mae’n Gadeirydd ar Fwrdd Cynghori Grŵp Arora ar Ehangu Heathrow, ac mae hefyd wedi bod yn Gadeirydd ar Ocado, First Leisure Corporation, Camelot, y Rheolydd Codi Arian Elusennol ac Amgueddfa Cyfryngau Bradford, yn ogystal â bod yn aelod o gyn-Gomisiwn Cwynion y Wasg ac yn un o ymddiriedolwyr yr Amgueddfa Wyddoniaeth.

Mae Michael Grade yn eistedd yn Nhŷ’r Arglwyddi fel Arglwydd nad yw’n perthyn i unrhyw grŵp seneddol. Cafodd ei gyfnod fel arglwydd ei greu ym mis Ionawr 2011.

Ymunodd Michael Grade â Bwrdd Ofcom ar 1 Mai 2022. Mae ei benodiad yn parhau tan 30 Ebrill 2026.

Mae Tamara Ingram wedi cael gyrfa helaeth ym maes hysbysebu, marchnata a chyfathrebu digidol yn ymestyn dros 35 mlynedd. Mae wedi dal sawl swydd arweiniol yn y diwydiannau creadigol ac roedd yn Gadeirydd Byd-eang Wunderman Thompson hyd 2020. Mae hi hefyd wedi gwasanaethu fel Prif Weithredwr Byd-eang J. Walter Thompson, Cadeirydd a Phrif Weithredwr Grey, a Phrif Weithredwr McCann Worldgroup a Saatchi a Saatchi yn Llundain.

Ar hyn o bryd, mae’n Gyfarwyddwr Anweithredol Marks and Spencer Group plc ac yn Gadeirydd yr elusen iechyd, Asthma + Lung UK. Mae hi hefyd yn Gyfarwyddwr Anweithredol Intertek Group plc, Reckitt Benckiser Group plc, a Chwmnïau Marsh & McLennan.

Mae Tamara hefyd yn hyfforddwr busnes sy’n canolbwyntio ar arweinyddiaeth. Arferai fod yn Gadeirydd pwyllgor codi arian y Royal Court, ac yn Gyfarwyddwr Anweithredol Sage Group plc a Serco Group plc. Dyfarnwyd OBE iddi am ei chyfraniad i dwristiaeth fel Cadeirydd Visit London yn 2012.

Ymunodd Tamara Ingram â Bwrdd Ofcom ar 2 Rhagfyr 2024. Mae ei phenodiad yn para tan 1 Rhagfyr 2028.

Ymunodd y Fonesig Melanie Dawes fel Aelod Gweithredol o’r Bwrdd a Phrif Weithredwr ym mis Mawrth 2020.

Cyn ymuno ag Ofcom, roedd Melanie yn Ysgrifennydd Parhaol yn y Weinyddiaeth Tai, Cymunedau a Llywodraeth Leol o 2015 ymlaen. Mae wedi dal amrywiaeth o swyddi uwch ar draws y Gwasanaeth Sifil, gan weithio mewn partneriaeth ar draws y sector cyhoeddus a’r sector preifat, gan gynnwys fel Hyrwyddwr Amrywiaeth a Chynhwysiad y Gwasanaeth Sifil.

Dechreuodd ar ei gyrfa fel economegydd, a threuliodd 15 mlynedd yn y Trysorlys, lle bu'n Gyfarwyddwr Materion Ewropeaidd rhwng 2002 a 2006. Roedd yn Gyfarwyddwr Cyffredinol yr Ysgrifenyddiaeth Materion Economaidd a Domestig yn Swyddfa’r Cabinet rhwng 2011 a 2015, a chyn hynny bu’n aelod o Fwrdd CThEF. Fel Cyfarwyddwr Cyffredinol Treth Busnes, roedd yn gyfrifol am yr holl drethi a thollau busnes ochr yn ochr ag arwain perthynas yr adran â’r cwmnïau mwyaf.

Mae Melanie wedi ysgwyddo amryw o rolau anweithredol, gan gynnwys gyda’r corff defnyddwyr Which?, ac mae’n un o ymddiriedolwyr y Patchwork Foundation sy’n helpu pobl ifanc sydd heb gynrychiolaeth ddigonol i fod yn rhan o ddemocratiaeth.

Ymunodd Lindsey Fussell ag Ofcom yn 2016 ac mae’n Gyfarwyddwr Grŵp ar gyfer Rhwydweithiau a Chyfathrebu. Mae’n arwain gwaith Ofcom yn y sectorau telegyfathrebiadau a phost, lle rydym yn ceisio diogelu buddiannau defnyddwyr, hyrwyddo cystadleuaeth a sicrhau bod rhwydweithiau8’n ddiogel ac yn gadarn. Fe’i penodwyd i Fwrdd Ofcom ym mis Rhagfyr 2020.

Cyn ymuno ag Ofcom, bu Lindsey yn gweithio mewn amrywiaeth o uwch swyddi arweinyddiaeth yn y gwasanaeth sifil. Roedd yn Gyfarwyddwr Gwasanaethau Cyhoeddus yn Nhrysorlys EM, lle bu’n arwain ar ddatganoli, addysg a diwylliant, amddiffyn a chyfiawnder troseddol, ac roedd yn gyfrifol am gyflawni agweddau allweddol ar Adolygiadau Gwariant 2013 a 2015. Mae hi’n gyfarwyddwr anweithredol (Cyfarwyddwr sy’n Ddigon Annibynnol) ar gyfer NGED, rhwydwaith dosbarthu trydan National Grid ar gyfer Cymru, de-orllewin Lloegr a chanolbarth Lloegr.

Ar hyn o bryd mae Ben yn Bartner Cyffredinol gyda chronfa fuddsoddi Keen Venture Partners, ac mae’n aelod o sawl Bwrdd, gan gynnwys Akami yn yr Unol Daleithiau a Renewi Ltd, cwmni blaenllaw yn yr economi gylchol yn y BeNeLux ac yn y DU. Mae’n gyn-Brif Weithredwr BT, KPN yn yr Iseldiroedd ac Alcatel Lucent. Mae hefyd wedi bod yn Gadeirydd Endemol ac yn Aelod o Fwrdd AkzoNobel yn yr Iseldiroedd a Bharti Airtel, gweithredwr gwasanaethau symudol, yn India.

Ymunodd Ben Verwaayen â Bwrdd Ofcom ar 1 Ionawr 2016.   Bydd ei benodiad yn parhau tan 31 Rhagfyr 2025.

Cafodd Bob Downes ei benodi’n aelod o Fwrdd Ofcom o 1 Chwefror 2018 ymlaen. Mae’n aelod o Fwrdd Cynnwys Ofcom a’r Pwyllgor Pobl. Bob oedd cadeirydd Asiantaeth Diogelu Amgylchedd yr

Alban hyd at 2023. Mae’n cadeirio Corff Goruchwylio Annibynnol y Comisiwn ar gyfer Rheoleiddio Cyfathrebiadau, sy’n goruchwylio'r gwaith o weithredu gwell Model Llywodraeth Rheoleiddio yn Iwerddon gan Eir. Mae Bob yn gynghorydd i nifer o fusnesau technoleg bach, gan gynnwys Kube Networks yn Glasgow. Mae ganddo gefndir mewn telegyfathrebiadau, sefydliadau celfyddydol a diwylliannol a gyda phrifysgolion busnes a thechnoleg.

Ymunodd Ben Downes â Bwrdd Ofcom ar 1 Chwefror 2018. Mae ei benodiad yn parhau tan 31 Ionawr 2026.

Cafodd Clive Jones ei eni a’i fagu yng nghymoedd de Cymru, a threuliodd y rhan fwyaf o’i fywyd gwaith yn ITV fel newyddiadurwr, cynhyrchydd a golygydd gyda YTV a TV-AM ac yn ddiweddarach fel Prif Swyddog Gweithredol Central Television a Grŵp Teledu Carlton. Bu hefyd yn Rheolwr Gyfarwyddwr ITV Network ac ef oedd Prif Swyddog Gweithredol cyntaf ITV News and Regions, ar ôl creu ITV plc.

Hyfforddodd fel newyddiadurwr gyda Yorkshire Post ar ôl graddio o’r LSE.

Mae Clive hefyd yn gadeirydd Sightsavers, elusen yn y DU ar gyfer pobl sy’n colli golwg, ac Ymddiriedolaeth Runnymede, sef prif felin drafod cydraddoldeb hiliol y DU, ac ef yw Ombwdsmon y Cyngor Cenedlaethol ar gyfer Hyfforddi Newyddiadurwyr. Cadeiriodd y Pwyllgor Argyfyngau Brys, roedd ar fwrdd S4C a’i gangen fasnachol S4C Masnachol am chwe blynedd, ac mae’n gyn-gadeirydd Cronfa Eiddo Deallusol Cymru a National Theatre Wales.

Ymunodd Clive Jones â Bwrdd Ofcom ar 12 Chwefror 2024. Mae ei benodiad yn parhau tan 11 Chwefror 2028.

Mae gan Karen yrfa nodedig dros 30 mlynedd ym maes plismona, gan ymddeol fel Comander yn Heddlu Dinas Llundain yn 2020. Dechreuodd ei gwasanaeth fel swyddog yng Ngogledd Iwerddon, ac mae ganddi brofiad helaeth mewn ystod eang o ymchwiliadau cymhleth gan gynnwys diogelu, lladdiad, gwrthderfysgaeth, troseddau difrifol a chyfundrefnol. O ganlyniad, mae ganddi ddealltwriaeth gadarn o anghenion unigryw cymunedau sy’n byw yng Ngogledd Iwerddon.

Yn fwy diweddar, fel Comander a’r Cydlynydd Cenedlaethol ar gyfer Troseddau Economaidd, bu’n goruchwylio’r ymchwiliadau ariannol mwyaf difrifol yn y Deyrnas Unedig. Karen hefyd oedd arweinydd gweithredol yr Heddlu ar gyfer Atal Seiberdroseddau, a bu’n gweithio gyda rhanddeiliaid allweddol a’r trydydd sector i fynd i’r afael â risgiau sy’n dod i’r amlwg yn y byd ar-lein.

Yn 2020 ymunodd Karen ag UK Finance fel Rheolwr Gyfarwyddwr y Strategaeth Wybodaeth, gan weithio ar draws y sector bancio i adolygu a rheoli’r defnydd o wybodaeth. Yn fwy cyffredinol, roedd ei rôl yn golygu cydweithio â nifer o sectorau mewn perthynas â’r bygythiad o niwed ar-lein a newidiadau deddfwriaethol arfaethedig. Camodd Karen i lawr o’r rôl hon ym mis Tachwedd 2021.

Ym mis Medi 2022, ymunodd Karen â’r Awdurdod Ymddygiad Ariannol, fel Cyfarwyddwr Strategaeth, Polisi, Rhyngwladol a Gwybodaeth yn y Tîm Gorfodi. Yn y rôl hon, mae Karen yn arwain y swyddogaethau arbenigol sy’n cefnogi ehangder gweithgareddau gorfodi a goruchwylio’r farchnad yr Awdurdod Ymddygiad Ariannol, gan helpu i sicrhau bod ganddo’r adnoddau sydd arno ei angen i wneud ei gwaith yn effeithiol.

Ymunodd Karen Baxter â Bwrdd Ofcom ar 28 Mawrth 2022. Mae ei phenodiad yn parhau tan 27 Mawrth 2026.

Ar hyn o bryd, mae Angela yn un o ymddiriedolwyr Ymddiriedolaeth Amgueddfeydd Efrog ac yn Gadeirydd ei Bwrdd Prosiectau Cyfalaf. Mae’n Uwch Aelod Annibynnol o’r Panel Penodiadau Cyhoeddus. Mae wedi bod yn gyfarwyddwr anweithredol ar nifer o sefydliadau nid-er-elw gan gynnwys Cadeirydd International House Trust, Is-gadeirydd Coleg King Llundain, ymddiriedolwr Cronfa Dreftadaeth y Loteri Genedlaethol, ac aelod o’r Cyngor Amgueddfeydd, Archifau a Llyfrgelloedd.

Roedd gyrfa weithredol Angela ym maes cyllid rhyngwladol, yn bennaf fel Rheolwr Gyfarwyddwr Morgan Stanley lle bu’n arwain tîm ymchwil technoleg byd-eang. Roedd yn aelod o Weithgor Cytundeb Byd-eang y Cenhedloedd Unedig ar gyfer materion yng nghyswllt cyfrifoldeb cymdeithasol corfforaethol ym maes buddsoddi.

Ymunodd Angela Dean â Bwrdd Ofcom ar 30 Medi 2018. Mae ei phenodiad yn parhau tan 29 Medi 2026.

Mae gan Will bron i 30 mlynedd o brofiad yn y diwydiant cyfryngau. Dechreuodd ei yrfa fel ymgynghorydd rheoli gyda KPMG, cyn treulio pum mlynedd yn BBC Worldwide (BBC Studios erbyn hyn) lle bu’n gweithio ar draws gweithrediadau masnachol a rhyngwladol y BBC.

Yn ddiweddarach, helpodd i lansio ask.com yn y DU cyn symud i Sky, lle daeth yn Gyfarwyddwr Masnachol a Gweithrediadau ei fusnes cyfryngau newydd. Ymunodd â GCap Media plc yn 2006 fel Cyfarwyddwr Strategaeth Grŵp.

Ar ôl i Global Media ac Entertainment Ltd brynu GCap Media yn 2008, cafodd ei benodi’n Brif Swyddog Strategaeth Global ac ymunodd â phrif fwrdd Global. Yn ystod ei gyfnod yn Global, roedd Will yn gyfrifol am sefydlu'r Global Academy, sef ysgol y wladwriaeth ar gyfer pobl ifanc o bob cefndir sydd eisiau dechrau gyrfa yn y diwydiannau creadigol. Fe wnaeth roi’r gorau i’w ddyletswyddau ar Fwrdd Global ac Entertainment Ltd ym mis Rhagfyr 2020.

Ers 2021 mae wedi bod yn Gyfarwyddwr Anweithredol Primedia, y grŵp cyfryngau a hysbysebu blaenllaw sy’n canolbwyntio ar Affrica, ac roedd yn Ymddiriedolwr Baker Dearing Educational Trust rhwng 2021 a 2024. Daeth yn ymddiriedolwr yr elusen Education and Employers yn 2024.

Ymunodd Will Harding â Bwrdd Ofcom ar 3 Hydref 2022. Mae ei benodiad yn parhau tan 2 Hydref 2026.

Mae gan Richard bron i 30 mlynedd o brofiad ym maes datblygu polisi cyfathrebu a thechnoleg. Ers 2010, mae wedi bod yn Aelod anetholedig o Dŷ’r Arglwyddi, ar ôl iddo gael ei wneud yn arglwydd am oes sef Barwn Allan o Hallam, o Ecclesall yn sir De Swydd Efrog. Mae wedi bod yn aelod nad yw’n perthyn i unrhyw grŵp ers 2 Hydref 2024 ac arferai fod yn gysylltiedig â phlaid y Democratiaid Rhyddfrydol.

Dechreuodd ei yrfa broffesiynol gyda’r GIG, fel Datblygwr Systemau, gan adeiladu rhwydweithiau cyfrifiadurol a systemau gwybodaeth ar gyfer Avon FHSA. Rhwng 1997 a 2005 roedd yn Aelod Seneddol dros Sheffield Hallam, a bu hefyd yn Gadeirydd y Pwyllgor Dethol ar Wybodaeth tan 2001. Ymunodd â Cisco Systems yn 2005, gan ymgymryd â rôl Cyfarwyddwr Polisi Cyhoeddus tan 2009, lle bu’n arwain gwaith y cwmni ar yr holl faterion polisi telathrebu gyda gwleidyddion a rheoleiddwyr. Yna, rhwng 2009 a 2019 bu’n gweithio yn Facebook (Meta bellach) fel Is-lywydd Polisi Cyhoeddus; gan arwain tîm o fwy na 70 o arbenigwyr polisi ar draws EMEA, gan weithredu fel uwch wneuthurwr penderfyniadau ar gwestiynau polisi sensitif. 

Ar hyn o bryd mae ganddo rolau Bwrdd Anweithredol gyda Chwmnïau Buddiannau Cymunedol New Automotive a’r Ganolfan Data Cyhoeddus. Mae ei rolau Anweithredol blaenorol yn cynnwys bod yn Aelod o Fwrdd Arsyllfa Cyfryngau Digidol Ewrop, Cadeirydd Tasglu Pŵer y Cyfryngau ac Aelod o Fwrdd Ymddiriedolaeth Dinas Sheffield.

 Ymunodd Richard Allan â Bwrdd Ofcom ar 1 Tachwedd 2024. Mae ei benodiad yn parhau tan 31 Hydref 2028